Home Economia “Nada di gaba”. Rating di Standards & Poor ta coloca Aruba apenas...

“Nada di gaba”. Rating di Standards & Poor ta coloca Aruba apenas ariba “junk”

119
0
SHARE
- Advertisement -

Segun Economista Ben Marapin:

ORANJESTAD (AAN) – E Economista sr. Ben Marapin a referi na e rapport di Standards & Poor’s cu recientemente Gobierno d Aruba a ricibi y e manera con e, como experto ta interpreta esaki, ta basta skerpi.

Den entrevista cu DIARIO, sr. Marapin a menciona e hecho cu Standards & Poor’s ta bin Aruba cada dos aña y nan ta huzga e situacion di finanzas publico di Aruba, den cual ta indica cu e aspecto comercial na Aruba no tabata bon y a duna outlook negativo.

Marapin a comenta cu e gobierno nobo a bin cu medidanan basta pisa cu a hisa hopi e entrada, pa caha di gobierno. E mes a bisa gobierno cu mester bin cu medida pero alavez baha e gastonan di gobierno.

Standards & Poor’s ta bisa si cu e deficit a wordo reduci, pero no por sigui cu mesun historia. Marapin a splica cu e entidad a señala cu e outlook ta stabil pero esey no kiermen algo di gaba.

Marapin a señala cu si wak e rating di S&P esaki no a cambia. Esaki ta e parti crucial unda nan ta bisa cu nan ta huzga nos pais riba e categoria unda e ta, y esey no a cambia.

Por ehemplo paisnan manera Merca, Hulanda, Suiza, Alemania, y algun mas, tin categoria triple A, pero un pais manera Venezuela ta gewoon “junk”.

“Nos ta un poco ariba cu ‘junk’. Nada di A den dje, nada di gaba” y esey no a cambia. Gobierno ta mire como positivo, pero segun sr. Marapin e lo tabata positivo si e rating di Aruba lo a subi na un mihor categoria.

E di dos punto cu sr. Marapin ta haya cu mester tene cuenta cune y cu Standard & Poor’s mes ta bisa ta cu gobierno a cera un protocol cu Hulanda y cu nan no ta mira realmente cu nan ta bay cumpli cune. Na bista di S&P gobierno no ta bay cumpli cu loke a wordo palabra y esaki ta algo cu ora e inversionistanan lesa e rapport mas deep lo tene cuenta cune.

“Mi no ta kere cu nos ta den un situacion pa bisa ‘hey great’. No lubida cu un medida cu mi ta menciona cu ta e aumento di BBO di 3 pa 6% ta trece por lo menos 240 miyon florin extra den caha di gobierno, y si esey lo a wordo uza pa traha riba e deficit awe sigur, Standard & Poor’s lo a duna positivo y e rating lo a subi”, e Economista Ben Marapin a señala.

Berdad e deficit a baha pero un parti di e entrada aki so a bay pa reduci e debe y e otro parti a bay pa gasta extra, segun Marapin a subraya.

Sr. Marapin a expresa cu cifranan no ta gaña, pero e no por bisa esey di e politiconan. “E cifranan ta bisa bon cla cu e situacion di finanza publico a mehora levemente, pero gracias na e medidanan pa hisa e entrada. Pero un parti crucial cu mester trata riba dje ta pa controla nos gastonan y baha esaki structuralmente. Esey no ta sosode, pero contrario e gastonan ta wordo hisa”, asina sr. Marapin a subraya.

Marapin ta remarca cu di loke a sosode den pasado no a bin cambio den esey. Gastonan ta sigui di mas. “Den pasado gobierno tabata fia cen creando un debe astronomico, cu nos tin cu paga mas di dos miyon pa aña na interes, cu ta un cos cu no tabata bon at all. Ami a critica esey semper, y awendia nos ta weita cu nos ta sigui gasta cen di mas como gobierno. Nos no a fia cen pa aumenta e debe pero nos a hisa belasting”, sr. Marapin a señala.

E peso di esaki ta cay riba pueblo y costo di bida ta bira mas halto.

Finalmente, sr. Marapin ta subraya cu e rapport di S&P ta den linea cu CAft. CAft ta bisa cu mester bin cu mas medida pasobra gobierno no a cumpli cu e palabracion cu ta loke S&P a constata. IMF ta den e mesun linea. No ta asina cu un ta contradeci otro. Tur tres nan linea diki ta riba e mesun punto: basta gasto y bin cu un maneho realistico. Pa gobierno no bin cu planes pasobra no ta bay logra y si no cumpli nan lo exigi di mas medida.

- Advertisement -

DUNA COMENTARIO

Please enter your comment!
Please enter your name here