ORANJESTAD (AAN): Tur aña Parokia di Santa Filomena ta celebra e fiesta di su patrona, desde di e prome aña como parokia esta for di 1949. E aña aki na un manera particular parokia di Paradera ta celebra e fiesta aki cu gran hubilo debi na e aña di hubileo di 70 aniversario di nos parokia.
E prome dia di nobena ta cuminsa diabierna awo 2 di augustus pa 6:15 di atardi den misa sigui pa un Santo Sacrificio di Misa. Durante e dianan di nobena un grupo di parokia lo dirigi e nobena cu participacion di e parokianonan di diferente barionan di parokia y e fielnan en particular.
E nobena ta sigui te cu diasabra 10 di augustus. Aki DIARIO ta presenta e schedule di e dianan di nobena.
Durante e Santo Sacrificio di Misa den e dianan di novena lo reflexiona riba Santa Filomena su bida, birtud y milagernan. E dia grandi mes ta diadomingo 11 di augustus proximo, cu Iglesia Catolico ta recorda memoria di Santa Filomena. Pa 5or di atardi for di Parkeerplaats di misa lo sali cu procesion pasando den e cayanan di Paradera rond di misa cu participacion di e pueblo presente cargando e imagen di Santa Filomena. Pa 6or atardi lo sigui cu e Santo Sacrificio di Misa Solem concelebra cu participacion di e pueblo di Paradera. Ta recorda e muchanan di Prome Santa Comunion di e aña aki, Grupo AJMG y Scout Group di Casibari y e Pueblo y Fielnan di Parokia di Paradera pa ta presente 4:45 di atardi pa prepara pa e procesion.
Pastoor Canuto ‘Toti’ Fuentebella hunto cu e Comision Organizado Hubileo 70 Aniversario ta invita; tur parokiano, deboto y pueblo di Aruba en general pa participa activamente na e celebracion solem aki. Di e forma aki e parokianonan ta prepara nan mes pa celebra e hubileo di 70 aniversario di parokia dia 8 di september venidero.
