ORANJESTAD (AAN) – Parlamentario Marlon Sneek, di fraccion di AVP, a elabora tocante overtime di maestronan, pasobra pa nan ta importante pa pueblo compronde e tema aki bon.
Overtime pa maestro no ta traha overtime pasobra un colega no a bin y e mester tuma su lugar over. Esaki ta tuma lugar ora tin cierto docente, por ehemplo esun cu ta duna Wiskunde, pasobra tin un cantidad di alumno den tanto klas cu mester haya e materia aki.
Den e curriculum e alumno ey mester haya tanto ora di Wiskunde, Biologie, Spaño, Ingles, etc., y mester di un maestro pa duna e materia. E maestro aki por ta ya a cera su 32 ora y e tin cu duna 8 of 10 ora mas na otro klas pa esaki por cumpli cu e curriculum pa e alumno por haya tur e vaknan cu ta wordo poni den su pakete di materia, pa e por haya su diploma.
Na momento cu un minister bisa cu e ta bay corta den esaki of e kier bay paga nan como los uuren e maestro ta bay bisa pa e haya su oranan regular y teynan e ta yega, cu consecuencia cu lo tin cursonan cu no por wordo duna. En todo caso ora e mucha caba su scol e diploma cu e ta haya no tin balor, pasobra e no a haya tur e vaknan cu e mester,
Sneek a bisa cu e no ta compronde di kico e minister di enseñanza ta papia y e ta lamenta pasobra tres biaha e fraccion a haci peticion pa un reunion publico prome cu Parlamento a drenta den recess, meramente pa discuti riba tur e temanan aki, pero por mira cu coalicion a hunga un wega politico, y a pidi un bijeenkomst sabiendo cu tres biaha fraccion di AVP a pidi un reunion publico.
Pero nan a prefera di hunga un wega politico pa no asumi su responsabilidad. Fraccion di AVP tabata tey den su totalidad pa por a cumpli cu e reunion cu nan mes a pidi, pero awor coalicion ta uza excuse cu nan tabata tin hende afo. Asina Marlon Sneek a subraya.
Segun Sneek e desaster cu tin aworaki den enseñanza, ta danki na e fraccion di MEP cu a contribui cu e mal maneho aki. Nan tin 9 asiento y nan por bisa e minister kico haci pero nan ta opta pa keda dushi sinta riba stoel aki aya, kita un of dos tarea for di su cartera pero no a tuma su responsabilidad pa yama e minister pa bin den Parlamento, y duna cuenta di locual e ta haciendo.
AVP ta lamenta esaki pasobra nan a kere cu fraccion di MEP ta mas serio y nan lo a para tras di e peticion di AVP pa un reunion publico, pero no. Nan ta spaar nan coalicion y keda sinta riba stul y nan no kier tuma enseñanza na serio, segun Parlamentario Marlon Sneek.
