Analisis
September 2017 indicacion pakico pueblo ta papia di corupcion
Si tin un rapport cu no a cay nada straño pa pueblo, ta e rapport cu Aruba conoce corupcion cu lo ta grandemente representa den nos mundo politico.
Pueblo tin rason di pensa cu loke ta pasa na su pais no tin nomber?
Ayera nos a bay controla kico por a pasa cu pueblo na 2017 a bira lomba pa Gabinete Mike Eman.
Nos ta tene cuenta cu na 2017 ainda e huma di Citgo tabata cubri Aruba, cu ainda no a ricibi e rapport “Bo Aruba” cu awe Ministerio Publico mester dicidi si ta base pa persigui gobierno Mike Eman of no.
Hecho ta pueblo no ta e bobonan cu politiconan kier pa nan ta. Pueblo no ta consisti di hende cu nunca a bay school y ta depende di un grupo cu pa su “inteligente” cu e ta, a ruina un pais y a hinca e pais den crisis.
Eleccion 2017 a demostra cu pueblo no ta bobo. Pueblo a mira cu e huma di Citgo tabata bini di direccion robes.
Ayera den un revision di loke a pasa cu Aruba durante ultimo añanan, nos a topa cu e berdad cu ta exactamente dos aña pasa cu gobierno Mike Eman a dicidi cu ta pueblo lo paga pa e fiesta di “Happy Birthday Mike Eman” na Spaans Lagoen.
E “corridor” tabata completamente berde di inteligencia politico na fin di un campaña electoral den cual pueblo ya a cuminsa demostra su rechaso pa e forma cu gobierno anterior a abusa di su confiansa.
Ta increibel cu durante tratamento di presupuesto di 2018, un pueblo cu tabata paga pa e crisis ocasiona pa Gobierno Mike Eman, ainda mester a scucha cu tin un gasto di 141 Mil Florin pa e paga pa asina por a canta “Happy Birthday” pa Mike Eman.
E loke a pasa na 2017 no tin nomber y ta solamente un prueba mas cu ta abuso a haci cu placa di pueblo cu ya tabata den crisis y ya a tende di Hulanda cu mester a tuma medida serio.
Pueblo mester a bay canta Happy Birthday pa Mike Eman na e brug di Spaans Lagoen cu ta parti di e proyectonan cu ta causa tanto pregunta na Aruba y riba cual tin un rapport di Algemene Rekenkamer Aruba den man di Ministerio Publico.
Di kico nos ta papia ainda? Con por ta posibel cu mayoria di AVP den Parlamento por a bay di acuerdo cu tal accion?
Awe ta mas cu normal cu pueblo di Aruba ta duda den integridad di politica. Ta mas cu normal cu pueblo ta pensa cu ta corupcion ta maneha Aruba.
Prome di September 2017 pueblo di Aruba a haya un bofta den su cara di parti di gobierno Mike Eman cu awe mester mira unda ta saca placa pa canta “Happy Birthday” pa su lider.
