Analisis
Un siman nobo a habri cu un mundo observando paisnan cu ta basha abou. Hopi ta puntra nan mes kico ta pasando. E contesta mas directo cu a wordo duna den fin di siman a bini di e Ministro di Financia di Argentina cu a mustra cu e ta duna pueblo loke e ta desea, cu ta e desastre cu un cadena di gobierno abusado a laga atras.
E palabranan aki por ta fuerte, pero nan ta encera berdad di pueblo cu a keda den desgracia na man di politiconan oportunista pero kier bolbe wordo pusha den pos dor di hende cu riba nan mes no por alcansa loke den nan soño sin frontera nan a fabrica.
Loke ta pasa na Argentina ta loke a pasa na Venezuela, a pasa na Curaçao y a pasa na Aruba pa duna e ehemplo mas cerca di cas. E ta e otro cara di regla democratico cu ta stipula cu pueblo ta haya loke e ta desea.
Awe na Argentina, gobernantenan cu a causa ruina di un pais decadanan largo ta uni pa stroba un gobierno pone orden na e pais.
Awe na Venezuela, Nicolas Maduro a destrui su pais, su region y tin mundo den lamento. Pakico Maduro por a causa e desastre cu e pais conoce actualmente?
E contesta ta masha simpel. Ta pueblo di Venezuela a vota pa Chavez, cu for di principio a duna muestra di loke e kier.
Chavez a trata na baha e gobierno democratico di Carlos Andres Perez pa e haya poder. E no a logra. Na momento cu el a alcansa poder, el a demostra kico e ta haci. Pueblo a sigui vota pa Chavez cu a destrui Venezuela y despues di su morto a entrega cadaver di bienestar di Venezuela na Nicolas Maduro.
Awe na Curaçao gobernacion actual ta lucha contra aanwijzing. Placa di e pais a caba. Turbulencia y problema serio a destrui fundeshi di e pais. Den prizon ex Ministro Presidente Gerrit Schotte ainda ta sigui instiga cu e speransa cu un dia e lo bolbe na poder.
Na Aruba e pio Ministro Presidente cu Aruba a registra den su historia, Mike Eman, a subi baricada. E no por drenta Parlamento pa contesta kico a pasa cu Aruba cu el a laga bancarota.
Nos no ta gaña. Aruba tabata den estado di bancarota ora gobierno actual a haya mandato di pueblo pa trece un cambio pa Aruba.
Mientras Aruba mester mira con e ta haci pa sali for di problema, Mike Eman ta riba baricada pa instiga e pueblo cu el a desgracia cu mentira y abuso di poder. Cu brasa y sunchi Mike Eman ta trata na silencia su consenshi cu mester ta grita pa loke el a haci cu Aruba.
E mentira di BBO cu el a uza pa hiba un maneho financiero di abuso contra e pueblo di Aruba, cu awe mester lastra e cadena di debe nacional na su pia. Mike Eman cu a trapa riba nos leynan pa entrega Aruba na Citgo di Nicolas Maduro.
Tres lider di un solo region ta uni riba un potret cu ta representa tres acusacion di pueblo. Tres pais cu a wordo herida y mester lucha pa haya un solucion, mientras e lidernan politico cu a causa nan desgracia nunca a pidi dispensa pa e drama cu nan a causa nan pais.
Populismo ta e don di ciega publico. E talento special di politiconan oportunista cu awe ta desgracia di democracia.
Nan ta mata e creencia di pueblo den politica limpi. Nan ta destrui camindanan pa e pueblo haya solucion. Tur loke nan tin nan dilanti ta e oportunidad cu politica ta ofrece pa nan eleva nan mes.
Hugo Chavez, Gerrit Schotte, Mike Eman: tres lider politico cu a demostra kico ta populismo y con por probecha di buena fe di pueblo pa alcansa poder!
