Prinses Christina a determina rumbo di su destino

    885
    0
    SHARE
    - Advertisement -

    Exclusivo

    Un alma artista y di balentia a habri hala y kibra frontera

    *Reino Hulandes ta despedi di un princesa unico

    *For di Groningen el a crusa oceano pa crea su herencia 

    ORANJESTAD(AAN)–Na momento cu dokternan a diagnostica cancer di weso, a bira conoci tambe cu su final lo a bati na porta. Den e silencio cu el a skirbi su historia, el a skirbi tambe su lucha contra e parti di bida cu no a permiti triunfo. Pero el a keda triunfado ora el a despedi pa laga atras un historia di inspiracion sigur pa hobennan cu el a sostene pa nan sigui nan soño.

    Ayera a trece e noticia pa Reino cu Maria Christina, Prinses der Nederlanden, Prinses di Oranje-Nassau, Prinses di Lippe-Biesterfeld, e despedi.

    Naci dia 9 di October 1947, e tabata e di cuater y ultimo yiu di Reina Juliana y Prins Bernard. Originalmente Reino a conoce como Marijke, cu a nace despues cu su mama tabata victima di Rode Hond, loke a pone cu el a nace cu cierto problema manera di bista.

    Na 1963 el a dicidi cu e kier wordo yama Christina. Ta cu e nomber aki el a bay Amersfoort Lyceum y a gradua na 1965.

    Tabata e intencion pa Prinses Christina a profesionalisa su mes den pedagogia na Rijksuniversiteit Groningen.

    El a inscribi su mes como miembro di e sociedad di studiantenan GVSC Magna Pete,  cu tabata brinda su miembronan preparacion pa e bida despues di estudio y riba tur tereno tabata sostene nan talentonan.

    Prinses Christina a bay biba cerca e Comisario di La Reina na Groningen, pero tabata participa activamente na actividadnan. El a participa na e introduccion hopi exigente di Magna Pete di tres siman.

    Den e periodo conoci como “ontgroening” Prinses Christina mescos cu tur miembro no solamente a cera conoci cu disciplina y formacion di personalidad fuerte.  Su talentonan musical a haya oportunidad pa bini completamente dilanti.

    Na final di e epoca di introduccion y su aceptacion oficial na e sociedad, e tabata parti di un musical den cual el a destaca.

    E bos unico di e prinses, cu tabata parti integral di e club cu tabata conoce como Christina, a haya tur atencion. Su mama, Reina Juliana, como otro mamanan tabata conoci cu e sociedad di studiantenan, caminda e anuncio a drenta cu e ta bandona Groningen pa na Montreal, Canada, sigui su estudionan den pedagogia musical na conservatorio.

    Na 1975 el a casa cu e Cubano, Jorge Guillermo, y a bira mama di tres yiu. Pa medio di su matrimonio el a perde derecho riba trono.  Despues di tempo el a divorcia.

    Musica a bira su profesion y el a duna les na New York, caminda el a biba prome cu el a muda pa Italia.

    Dos CD a duna muestra di su bos unico, cu el a presenta na algun ocasion pero no a tene pa su mes.

    Na 1989 Prinses Christina Concours a cuminsa yuda hobennan riba e tereno di musica. E tabata parti activo di e organisacion cu tabata yuda hobennan desaroya nan talentonan musical.

    Prinses Christina a dicidi di bay studia pedagogia di baile, zonido y contacto fisico. Asina el a yuda personanan cu a nace cu e problemanan di bista pa medio di organisacionnan special.

    Prinses Christina a hiba e tipo di bida abundante riba tereno personal, cu for di su hubentud el a busca.

    E ta gosa respet di tur cu a conoce pa e forma cu el a duna contenido importante na su bida sin kita for di e union cu el a mantene semper cu su famia.

    E amor special di Prinses Beatrix pa Prinses Christina ta impresionante.

    Ayera tur cu a conoce Prinses Christina a ricibi e informacion cu mediconan a anuncia. Prinses Christina a lucha den e ultimo bataya.

    Na edad di 72 aña, el a despedi ayera. Un luz a paga den Reino cu a perde un prinses, un talento, un persona cu curashi, un ehempel pa tur cu a conoce.

    DIARIO ta extende su palabranan di condolencia na nos Cas Real. Paz na restonan di Prinses Christina.

    - Advertisement -

    DUNA COMENTARIO

    Please enter your comment!
    Please enter your name here