Home CORTE Compania PMEC a gana su caso contra Citgo Aruba Refining den Corte...

Compania PMEC a gana su caso contra Citgo Aruba Refining den Corte di Apelacion

962
0
SHARE
- Advertisement -

Citgo tin di paga 3 miyon y pico Florin

ORANJESTAD (AAN): Corte di Apelacion riba Diamars, a duna sentencia den un caso di Project Management Engineering & Consultants NV (PMEC) contra Citgo Aruba Refining NV (CAR).

E caso tabata trata di un claim di PMEC contra Citgo (CAR) di Afl. 3 miyon y pico pa servicionan presta cu CAR tabata nenga di paga p’e.

E justificashon cu Citgo (CAR) a usa pa no paga PMEC tabata, entre otro argumentonan, cu e sancionnan di Presidente Mericano contra Venezuela y PDVSA, tabata prohibi pago sin permiso di autoridadnan Mericano y cu e authoridadnan ey no a duna e permiso rekeri.

Den e decishon di Diamars, Corte di Apelashon a bari e argumento ey di CAR foi mesa basa riba e siguiente considerashonnan:

(1) Citgo (CAR) no por basa su mes riba force majeure of circumstancianan cu nan no por a anticipa pasobra mayoria di e servicionan di PMEC a worde solicita door di CAR despues di augustus di 2017 ora cu e sanccionnan Mericano a worde institui.

(2) No obstante institushon di e sanccionan Mericano na augustus 2017 CAR toch a keda haci uso di e servicionan di PMEC, sin consulta cu PMEC ariba e posibilidad cu talvez e sancionnan ey lo por a prohibi CAR pa paga pa e servicionan di PMEC. Bao di e circumstancianan ey falta di cumplimento cu e obligashonnan di CAR segun nan contract cu PMEC no por worde justifica.

(3) E sancionnan Mericano (muy particular Executive Order 13808) no ta prohibi pago pa servicionan cu PMEC a presta pero ta prohibi mas bien financiamento duna na Venezuela y PDVSA.

(4) Ademas General License nr. 2 y 2A specificamente ta permiti transaccionnan entre PDV Holding, CITGO Holding, CITGO Petroleum (e companianan di PDVSA estableci na Merca) y nan companianan afilia, di cual CAR ta uno. Esey kier men cu no tabata tin ningun obstaculo pa financiamento di e operashonnan di CAR door di CITGO Petroleum of PDV Holding.

(5) E argumento presenta pa e abogadonan Mericano di CITGO cu e General License nr 2 y 2 A no ta permiti pagonan na CAR pasobra tal pagonan lo favorece PDVSA y Venezuela no por a convence Corte di Apelashon pasobra e argumentonan ey no tabata cuadra cu e texto di e General Licenses en cuestion.

(6) Ademas, Corte di Apelashon no ta kere cu e autoridanan Mericano of cortenan na Merca lo impone boet of otro castigonan contra CITGO y su oficialnan si nan haci pagonan na CAR pa facilita pago pa e servicionan di PMEC manera cu e abogadonan Mericano di CITGO ta pretende.

   Conclusion:

E decishon di Corte di Apelashon pesey ta cu CAR mester paga PMEC Afl. 3 miyon y pico mas e gastonan di e caso.

Importancia di e decishon aki ta bay mas leu cu e caso di PMEC pasobra CAR y Citgo ta usa e mesun argumentonan di e sancionnan Mericano pa keda sin paga varios otro contratista y tambe pa keda sin paga RDA huur pa e refineria y sin paga Gobierno e impuesto cu nan debe segun ley.

E decishon di Corte di Apelashon ta un precedente cla y raspa cu ta mustra cu e argumentonan di CAR y CITGO cu nan no por cumpli cu nan obligashonnan financiero cu RDA, contratista y empleado, pa via di sancionnan Mericano contra PDVSA y Venezuela no tin ningun pero ningun credibilidad!

- Advertisement -

DUNA COMENTARIO

Please enter your comment!
Please enter your name here