Resumen di siman
Arogancia y ambicion personal kier sigui crea crisis pa Aruba
*Conseheronan experto oficial y empleado publico honesto ignora
*Miedo pa berdad total haya claridad ta stroba avance di Aruba
E siman cu ta termina awe, atrobe a conoce un ambiente cu ta stroba un bon gobernacion. Ta evidente cu ainda tin demasiado persona cu no ta comprende cu sistema democratico no a wordo inventa como un trapi pa hende bira importante ni alcansa aspiracionnan social eleva.
Durante e siman cu awe ta pasa pa pasado, tempo precioso a bay perdi cu atencion cu comunidad mester dedica na esfuersonan pa haya poder gubernamental.
Hunga santo y sabi ta elemento cu atrobe a bini dilanti y den cual hasta ta uza medidanan cu Reino por tuma contra Aruba como arma pa conkista gobernacion atrobe.
Cortinanan di huma ta wordo crea pa evita loke ainda mester bini na claridad ora rapportnan experto cu ta bou investigacion hudicial, divulga e reis di e crisis actual.
Ta stroba Aruba di scucha expertonan cu ta encarga na duna guia pa personanan cu den eleccion liber a wordo poni na mando pa medio di e sistema democratico.
Ta stroba Aruba realisa cu ta consenshi, decencia, loke ta yama integridad, ta dicidi si un gobierno ta hiba Aruba na un futuro feliz.
Democracia ta exigi personanan cu pueblo mester por confia, tuma mando di e pais. Moral y decencia, integridad, ta dicidi riba e calidad di gobernacion di e pais.
Nos sistema a tene cuenta cu nos gobernantenan mester di sosten experto den gobernacion. Pesey nos sistema legal a introduci instancianan cu ta conseha nos gobernantenan den cuadro di nos leynan.
Nos sistema conoce organonan oficial independiente Raad van Advies, Algemene Rekenkamer Aruba y Conseho Social Economico.
E crisis di Aruba ta directamente resultado di e forma cu a deshaci di consehonan oficial di expertonan oficial di e pais. Gobernantenan cu tin na nan disposicion un aparato gubernamental, empleadonan publico huramenta, pa asisti nan den nan trabou. Un aparato publico cu no a wordo institui pa nan habri bentana pa amigonan cay riba stoel importante.
E crisis di Aruba ta resultado di e forma arogante cu gobernantenan cu pueblo a kere cu e por a confia, a kibra confiansa di pueblo y a pone consehonan un banda pa nan haci y deshaci manera nan tabata kier.
Un siman di agitacion politico ta tras di lomba. Otro siman cu Aruba a perde na man di hendenan cu a laga un saldo fatal atras pa Aruba.
A keda y ta keda demostra cu Aruba no mester di titulo den gobernacion pero di alma, di consenshi, di balor Arubano pa e pais por tin trankilidad pa e traha pa interes general y no bolbe sirbi como trapi pa hende cu ambicion grandi cu ta stroba nan hasta di mira cu nan tempo a pasa y cu nan ta pasado.
Un pasado doloroso pa Aruba cu sali completamente na claridad a pesar di nan afan pa sconde tras di cortina di huma di inteligencia cu a kibra balornan y leynan di Aruba.
