Home arte y espectaculo Departamento di Cultura felicitando Faritah Luidens cu Premio Nacional di Teatro

Departamento di Cultura felicitando Faritah Luidens cu Premio Nacional di Teatro

152
0
SHARE
- Advertisement -

ORANJESTAD (AAN): Manera ta costumber, tur aña Departamento di Cultura Aruba a organiza e actividad teatral di mas grandi na Aruba cu ta relaciona cu Celebracion di Dia Mundial di Teatro.

Cada aña ta otorga e Premio Nacional di Teatro cu ta un obra crea pa e artista sr. Frank Croes na un persona, grupo of fundacion cu a traha y cu a contribui grandemente cu e desaroyo di teatro na Aruba.

Departamento di Cultura Aruba ta trece resumen di esaki:

Na aña 2005, A tuma luga e prome Celebracion di Dia Mundial di Teatro y a presenta ful un siman teatral, na unda e grupo di teatro local Asociacion Mascaruba a bay cu e prome Premio Nacional di Teatro, como reconocemento pa nan 44 aña di existencia riba e aña ey y e trabao incansabel pa desaroyo di teatro den nos comunidad y representacion na nivel nacional y internacional. Ademas e grupo aki a lanta for di mesun aña cu a tene e celebracion aki, mundialmente.

Na aña 2006, e autor, critico, actor, periodista y director di teatro señor Juby Naar, a bay cu e reconocemento aki bon mereci pa su valioso aporte y añanan di experiencia den e ramo artistico aki, contribuyendo grandemente den e mundo teatral den nos comunidad.

Na aña 2007, e docente, directora y actriz señora Amy Lasten a haya e reconocemento aki pa su incansabel aporte y trayectoria trahando specialmente cu hoben y su dedicacion como docente di teatro. Ademas señora Lasten a traha, durante su funcion cu e tabata encarga su mes cune na e Seccion di Teatro na Instituto di Cultura Aruba, diferente tayer y festival, manera ‘FESTESECO’ cu a crea un impacto exitoso plantando un simia grandi den curason di diferente hoben cu awendia ta desaroyando nan mes grandemente den e mundo aki.

Na aña 2008, e autor, director, actor y compositora señora Carmen Herrera y grupo teatral ‘Kibrahacha’ a conkista e logro aki pa su añanan di experiencia y varios representacion na nivel nacional y internacional, na unda a registra diferente obra den un forma magistral den un buki cu ilustracion y cantica cu a uza den cada obra.

Na aña 2009, e autor, director y actor, señor Oslin Boekhoudt (d.f.m.) a conkista e logro aki pa tur e añanan di experiencia y dedicacion pa cu teatro na nivel nacional y internacional. Un lista di cantidad di obra a ser dirigi exitosamente pa su persona, ademas di a gana e confianza y respet di hopi hende cu ta consider’e e ‘Tata di Teatro’ na Aruba.

Na aña 2009 tambe a ser entrega e ‘Reconocemento Special di Bida Largo’ cu cada lustro lo ser otorga na un persona, cu a dedica henter su bida na servicio di teatro, pa su trabao, sacrificio y aporte riba tereno di teatro. Pa prome ocasion, e tecniconan di Cas di Cultura Aruba a ricibi esaki, nan ta señor Richard Hopmans y señor Roland Bryson. E codiciado y excelente titulo aki a bay pa nan sigur bon mereci pa nan trabao incansabel di hopi aña.

Na aña 2010, e reconocemento aki a ser duna na un presidente Internacional di Teatro Amateur: señor Leo Tromp, kende tambe a fungi pa hopi aña como presidente di ‘IATA’ y ‘Fundarte’.

Na aña 2011, e reconocemento aki a ser duna na e comediante sr.Vale Croes (d.f.m.), kende tambe a celebra su 50 aña como un di e miho comediantenan na Aruba.

Na aña 2012, e reconocemento a keda na nomber di: drs. Mirto Lacle, Gestor Cultural, ‘Un homenahe na cultura y cuentanan di Compa Nanzi, 1952 pa 2012’ y cu e proyecto y ciclo multidisciplinario presenta na Cas di Cultura den luna di maart 2012 titula: ‘Cas di Cultura comberti den cueba di Compa Nanzi’ cu a encera 4 proyecto den uno, entre otro:

– Festival di conta cuenta cu un total di 14 contado di cuenta di Aruba cu a participa;
– Presentacion y investigacion di E Eterno Biahe Cronotopico di e cuentanan di Compa
Nanzi, di tradicion oral pa intermediacion (combinacion di video, audio y texto);
– Presentacion di e buki: ‘Lesa, Scucha, Canta, Actua, Baila, Gosa’ cu e ‘Aventuranan di Compa Nanzi’ cu 4 cuenta adapta pa señora Carmen Maria Herrera, cu cuenta y Disco Compacto.
– A traha documentario di nos cuenta di Compa Nanzi pa conserv’e;
– Dramatisacion di cuater cuenta di Compa Nanzi;
– Documentario di 2007 di ‘Ananzi Masters’ cu a filma contado di cuentanan di Ghana, Africa, Amsterdam y Rotterdam (Cu contadonan di cuenta di Aruba, Bonaire, Curaçao y Isla Riba) pa mustra e origen, desaroyo y cristalisacion di e cuentanan di Compa Nanzi.

Na aña 2013, a ser otorga e premio aki na señora Diana Antonette, den su Hubileo di 45 aña di Actriz y 30 aña directora di Teatro di Danza Arubano.

Na aña 2019, Despues di 10 aña Departamento di Cultura Aruba y Ministerio di Cultura a otorga e Premio Nacional di Teatro ‘Reconocemento Special di Bida Largo’ na señora Faritah Luidens cu su Celebracion di 50 aña den farandula cu su Mega produccion ‘Ken ta Basha Abou’ presenta conhuntamente cu Cas di Cultura na unda lo resalta su personahe ‘Tica Basha Abou’ cu excelentemente ta personifica y tambe den e mesun rosea DCA y Ministerio di Cultura a duna 5 Reconocemento Special na e 5 grandi nan veterano di teatro cu lo ta trahando directamente cu Faritah Luidens den su produccion ‘Ken ta Basha Abou’ manera ta: señora Luty Martinez, señora Yvonne Spellen, señora Magda Nicolaas, sr. Harold Pereira y señora Elsa Krosendijk.

Departamento di Cultura Aruba y Ministerio di Cultura ta felicita señora Faritah Luidens cu e Premio Nacional di Teatro, su Reconocemento Special di Bida Largo, pa su 50 aña den Farandula y tambe ta resalta e tremendo trabao haci pa su elenco di artistanan local cu ta haci di e tremendo espectaculo aki, uno berdaderamente exitoso.

 

- Advertisement -

DUNA COMENTARIO

Please enter your comment!
Please enter your name here