Home Enseñanza Director Rosy Abreu ta pidi comunidad pa sigui yuda scol Dornasol pa...

Director Rosy Abreu ta pidi comunidad pa sigui yuda scol Dornasol pa haya su bus

20
0
SHARE
- Advertisement -

E ta sumamente necesario:

ORANJESTAD (AAN) — Den un conferencia di prensa  Rosy Abreu-Vasco, director di Scol Dornasol pa gradici tur persona di nos comunidad cu a yuda e scol den su proyecto pa haya un bus pa transporta nan, pa haci actividad, entre otro les di landamento.

Juffrouw Rosy a expresa cu e ta gradici “Diosito” manera un di su colega Sharin, ta bisa y cu ta corde e palabra di su tata tambe, pasobra El a pone den nan caminda e personanan cu ta kere den loke e scol ta kere, cu ta su muchanan.

Sra. Abreu-Vasco a expresa cu e kier a gradici di antemano e pueblo di Aruba pa yuda den e tiki cu falta ainda. E ta keda pidi comunidad pa sigui yuda e muchanan aki, y e ta desea pa pueblo ser conoci cu e muchanan cu ta bin Dornasol. El a expresa cu tur mucha ta special pero e muchanan di Dornasol ta extra special, pasobra nan tin un inteligencia di un promedio normal, y hasta masha halto mes.

Ta muchanan cu tin problema di conducta di menor te severo of debi na nervio cu nan tin. E cabesante a comenta cu adultonan tambe tin biaha ta sufri di nervio y haya stress cu ta algo cu e muchanan tambe por sufri di dje. Tambe tin di nan ta sufri di spectrum di autism cu ta condicionnan normal, y no kiermen cu pa pueblo di Aruba e muchanan aki no ta conta mas.

Sra. Abreu-Vasco a indica cu e poblacion di muchanan aki ta relativamente grandi den nos comunidad y na mundo.

E motibo no ta conoci pero e grupo ta relativamente grandi, y sra. Abreu a comenta cu nos tur por haci manera e avestruz y hinca cabes den tera of tackle e problema.

El a subraya cu e muchanan aki ta un parti di Aruba su mañan y si no inverti den nan awo y no reinforza den nan di berdad riba nan balornan, mañan lo nos tin un pueblo lastima.

Cada habitante di Aruba mester cuminza y pensa y puntra su mes si ta nan yiu e ta, con dolor e ta si e mayor yega un camina y su yiu ta move un tiki mas hopi, ta bula di un stul pa otro, of drenta den un tienda cune y el a lastra bao di un reki, anto hendenan ta keda wak’e.

Con cada ciudadano ta sinti si tin un yiu asina? Un yiu cu dia di mañan e por ta un ingeniero, of un docter. Pero si nan ta wordo yuda pa compronde nan mes, kico nan tin, kico nan ta sinti pa nan deal cu nan condicion y kico otro comunidad ta spera di e muchanan aki.

Jurffrouw Rosy a comenta cu e hunto cu su team y Sharin cu a drenta pa keda y yuda haci e famia di Dornasol mas y mas grandi, pasobra union ta haci forza.

El haci un yamada na comunidad pa sigui yuda e scol, pa ora nan mira e bus cu e colibri core na caminda, sinti contento di a contribui pa e bus aki por core y hiba nan na actividad, les di landamento.

Nan ta mucha cu e scol ta proteha nan hopi y nan no por wordo poni den un bus pa bay les di landamento hunto cu otro scolnan. Nan por haya problema di oido si e situacion ta mucho pisa pa nan.

E poblacion escolar di e muchanan aki no ta mescos cu otro scolnan basico regular cu ta conta cu 300 pa 400 mucha, y aunke nan ta haya contribucion di mayornan, cada bez cu nan kier hiba nan Santa Rosa relaciona cu les di agricultura, nan tin cu huur un bus cu ta costa 300 florin pa dos ora.

Scol no por afford esaki y tampoco kier limita su alumnonan. Pa nan tin un bus ta hopi necesario. El a comenta cu tin hende ta puntra nan si gobierno no ta yuda scol. Gobierno ta yuda pero no tur cos tin cu cay bao gobierno, tin gastonan extra cu mester haci, y hopi cos cu e scol tin ta danki na e esfuerzo di su team completo di cual e ta hopi orguyoso y ta pidi Diosito pa bendicione.

- Advertisement -

DUNA COMENTARIO

Please enter your comment!
Please enter your name here