Home Tempo E imagen di temporada di horcan na September

E imagen di temporada di horcan na September

76
0
SHARE
- Advertisement -

Segun cifranan di ultimo cien aña, temporada di horcan ta culmina durante e segundo siman di September.

Na e momentonan aki, manera e grafico di sistemanan riba Oceano Atlantico ta mustra,  tin cuatro sistema ta move.  Esaki ta algo normal pa e luna aki pero tin factor cu ta haci cu publico na Aruba tambe tin mas atencion pa condicionnan di tempo.

Na prome luga, 2019 ta un aña di calor intenso. E condicionnan di tempo na Aruba tin un impacto riba hende, cu por ehempel ta sinti su mes mas cansa. E curpa humano ta reacciona.

E imagen cu nos ta produci awe, ta un imagen cu por mira den September cu sistemanan ta move tras di otro den Oceano y den Golfo di Mexico cu tambe ta un zona cu sistemanan ta crece den e temporada aki.

Manera ya a wordo bisa, e condicion calor di tempo ta haci publica mas consciente cu e ta den temporada di horcan.

Otro factor den e dianan aki ta, cu horcan ta riba ruta di destinacion conoci manera Florida, cu semper ta bon prepara pa e temporada di horcan ya cu sistemanan ta crusa Atlantico y acerca su costa.

E sistema mester subi tera un caminda, a menos cu condicionnan di tempo percura pa su destruccion. Un sistema cu sigur ta influencia sistemanan tropical manera horcan, ta e sistemanan friu cu e topa riba su ruta y ta hasta dicidi pa e ruta cu e ta tuma.

Tin horcan ta biaha canto costa di Merca pa bandona tropico y sigui bay ariba. Otro ta crusa Atlantico y bay caba como tormenta na Europa.

Algo cu sigur mester haci den temporada di horcan, ta sigui informacion di Servicio Meteorologico. Loke sigur no mester haci ta, hunga experto y bay analisa loke ta incomprendibel.

Meteorologia ta exigi conocemento necesario pa por pronostica condicionnan di tempo.

Sin guia di experto ta sumamente peligroso pa cuminsa crea panico pasobra ora tin motibo pa alarma, tur hende ta kere cu ta alarma falso.

Na e momentonan aki ta haci calor. Nos ta publica e grafico di sistemanan presente cu ta normal pa September cu segun e registro di ultimo cien aña, ta culminacion di temporada di horcan den Oceano Atlantico.

Mester tene na cuenta sigur cu September y October y te November ainda por tin un sistema tropical cu por varia di ola tropical te horcan den nos vecindario. Pero mester laga na expertonan pa bati alarma.

Na e momentonan aki no tin ningun menasa pa Aruba y e sistemanan riba Oceano tambe ta mustra cu nan kier bay Noord. Pero otro sistema por nace y segun e temporada ta bay hasta mas cerca di Caribe.

Por calcula cuanto horcan lo tin den un aña. Kico lo pasa exactamente y con cada sistema lo desaroya y comporta su mes ta depende completamente di e situacion di momento cu expertonan mester analisa pa por informa publico.

Aruba na e momento aki mester atende cu e calor excesivo cu ta afecta salud di hende.

 

 

 

- Advertisement -

DUNA COMENTARIO

Please enter your comment!
Please enter your name here