Home Comercio E ley di BBO ta contradeci e carta di minister y locual...

E ley di BBO ta contradeci e carta di minister y locual minister a bisa verbalmente

215
0
SHARE
- Advertisement -

Presidente di KvK:

ORANJESTAD (AAN): Diabierna durante un conferencia di prensa, Presidente di Camara di Comercio (KvK) Kawish Misier a papia riba e topico di BBO.

“Awe e gremionan ta bay splica nos banda di e storia sin miedo, pa loke ta e asunto di BBO”.

“Fin di December aña pasa Gobierno a pasa un ley di BBO cu ta bisa cu tur prijs na Aruba mester inclui e BBO y e comerciante no mag di calcula e BBO separa riba recibo y si un comerciante haci esaki toch, e ta haya un multa di 10.000 florin”.

Esaki segun Misier, kende a indica cu mesora diferente gremio a acerca KvK y un carta a wordo manda pa Gobierno y Parlamento, pa splica cu esey no ta un manera husto, pasobra e BBO ta keda cambia.

“Nos no por keda cambia tur nos prijsnan, nos menunan, nos flyers cada biaha cu BBO ta cambia”.

“Cinco luna largo tras di cortina nos a purba di dialoga cu Gobierno, unda cu nos a manda diferente carta y email y nos a yama”.

“Nos a pidi pa haya un reunion cu nan, pero esaki no a logar”.

“Tabata te ora cu den prensa cu un tono un tiki fuerte nos a expresa cu nos ta hopi preocupa, nos a logra haya atencion y nos a convence nan pa nan bin cu un session di stakeholder, pa nan scucha tur e gremionan, pa tende tur nos preocupacionnan, nos sugerencianan, nos preguntanan”.

Esaki segun e presidente di KvK, kende a indica cu den e stakeholders meeting e gremionan a expresa nan preocupacion cu nan no kier pa BBO bay den prijs.

“Nos a bin cu solucionnan hopi simpel, kico Parlamento tin cu cambia den e ley, cu ta dos articulo”.

“Uno ta cu e comerciante mag di cobra solamente 6% y di dos ta cu bo no ta bay cobra BBO riba BBO, pasobra aworaki e ta asina cu un comerciante ta cobra 6.38% pa e no sali perdi”.

“Nos a entrega esey y e ta na Parlamento pa nan copy/paste e conseho aki y hasie ley”.

“Nos tabata bao di e impresion cu nan a scucha nos, tur e gremionan tabata uni y a trece e mesun preocupacionnan dilanti, pero dos dia pasa nos a haya un carta unda cu Gobierno ta bisa cu aunque cu nan a scucha nos, BBO mester wordo inclui den e prijs, anto esey kiermen cu cada biaha cu BBO cambia nos tin cu cambia tur nos prijsnan”, segun Misier.

“Kiermen bo tin e ley, bo tin e carta y bo tin e reunion di Diahuebs”.

“E reunion di ayera tabata verbal y nan a bisa cu restaurantnan no mester cambia nan carchinan di menu y cu e companianan cu tin flyers no tin cu cambia esakinan”.

“Sinembargo, e ley cu nan a bin cune ta mustra claramente cu e comerciante no mag ofrece e prijsnan sin cu nan ta inclui BBO”.

Esaki segun Misier, kende a indica cu no a cambia e hecho cu e comerciantenan tin cu cambia nan prijsnan riba varios mil di producto.

“E reunion entre KvK y Minister di Finanzas y Economia a bay na un manera profesional y constructivo, unda cu nos a scucha otro”.

“Eynan el a bisa cu e ley no ta corecto y cu nan tin cu cambia esaki, pasobra e pensamento di Gobierno ta cu solamente na supermercado e prijs riba shelf mester ta e prijs na caha, pero e no ta conta pa otro tipo di negoshi”.

“Solamente e restaurantnan tin cu pone riba nan menu un sticker cu ta bisa cu e prijs ta exclui impuesto, pero ora cu nan haya e recibo e prijs mester inclui e BBO”.

“Esey nan a bisa verbalmente y te ainda nos no a haya esaki por escrito”.

Esaki segun e presidente di KvK, kende a indica cu Dialuna ta bay manda un carta pa e minister pa pidi pa un clarificacion, pasobra e ley ta contradeci e carta cu minister a manda y locual e minister a bisa verbalmente.

 

- Advertisement -

DUNA COMENTARIO

Please enter your comment!
Please enter your name here