Home Policial Guardacosta a intercepta boto Venezolano tratando di trece droga y tambe hende...

Guardacosta a intercepta boto Venezolano tratando di trece droga y tambe hende ilegal

524
0
SHARE
- Advertisement -

Na cabez di Aruba

ORANJESTAD (AAN): E expertonan di Guardacosta cu tabata vigilando e sistema di radar marino riba Dialuna anochi, diripiente a nota cu e pantaya a detecta un movimento for di banda di Venezuela, y ta moviendo cu velocidad rumbo pa Aruba.

Inmediatamente e punto di sosten di Guardacosta na Aruba, a pone un speedboat di na tipo Metal Shark na altura pa nan cuminza prepara pa bay den su direccion.  Ora cu e bleep riba e radar a mustra cu e ta yegando como 5 miya leu di Aruba y cu e ta moviendo mas bien den direccion di San Nicolas, e ora e Metal Shark tambe a cuminza mobiliza den e area.

Na un forma tactico, e personal di Guardacosta cu tabatin abordo personal tambe di Arumil, a cuminza move estilo di sombra riba e obheto.

E obheto a resulta di ta un boto tipo peñero, y cu Guardacosta ta yama “tipo eduardoño”.  E boto color blanco tabata move den scuridad y di leu nan a nota cu tin hopi hende abordo.

Na un forma sorpresivo e Metal Shark a presenta riba e boto aki den area hopi cerca di Punta Basora, y a obliga esaki pa stop riba lama.  Cu arma punta riba e tripulantenan, nan tur a hisa man den halto.  E tabatin un solo outboard motor, cu a wordo poni riba neutral.

Abordo di e boto color blanco aki tabatin varios tanki di combustible, como tambe rugtas cu varios bulto.  Den e bultonan aki, a bin haya en total 40 pakete cu ta contene droga.  Tambe a haya arma di candela y municion.

Nan tur a wordo aresta, y e boto cu tur contenido a wordo hiba rumbo pa e Pier di Guardacosta.  Aki e bon colaboracion entre Arumil, Guardacosta, Warda Nos Costa, Douane, y e Helicopter di Cuerpo Policial tabata valioso.

E personanan tur ta Venezolano, y tin indicacion claro cu nan tabatin intencion di drenta Aruba ilegalmente, cu e droga, arma y municion.

Ora cu a yega na Pier, nan a wordo listra un biaha mas, a  tuma declaracion di cada uno, y asina tambe a identifica e Capitan.

Nan a wordo pasa pa Cuerpo Policial unda awor ta sigui cu e investigacion.  E boto mes a keda confisca, y muy probablemente esaki lo worde destrui.

- Advertisement -

DUNA COMENTARIO

Please enter your comment!
Please enter your name here