ORANJESTAD (AAN): Manera DIARIO a trece dilanti, diabierna mainta tabata tin un accion special na Club Kibrahacha unda un grupo grandi, conforma pa hobennan y adultonan, a manifesta contra e cambio climatico.
Rond mundo tin un movimento grandi di hobennan cu ta manifestando pa e gobernantenan tuma accion y no keda na palabra so haci algo contra e cambio climatico.
Esaki ta un prome accion cu a tuma lugar na Aruba pero segun e organizadornan di ‘Climate Action Aruba’, Anita Aerts, esaki no lo ta e ultimo tampoco.
Den e caso aki a conta cu participacion di hopi mucha y hoben pero e grandinan di Kibrahacha tambe a bisa cu nan tabata kier a bira parti di e manifestacion ya cu nan tambe preocupa y kier duna un aporte pa yuda cu e concientizacion, Jeffrey Matos di Club Kibrahacha a remarca.
