Recientemente a tuma lugar un poco prome cu bahada di solo riba Bushiri Beach, un acto oficial di instalacion di lidernan nobo di Arubaanse Padvindsters Gilde. E tabata un momento special pa e lidernan scout na Aruba.
E momento ey esposa di Gobernador Boekhoudt tambe tabata presente pa e actividad aki, cu oficialmente a wordo yama “Instalacion y Renobacion di Promesa”.
Famianan tambe tabata presente na momento cu nan a mira con nan famia a keda instala sea como Jong Leiders, of tambe como Lider.
Esnan cu a bira Jong Leiders ta Tanishka Roos, Taisha Henriquez, Mandy Laaf, y Aracellys Tromp.
Como Leiders a keda instala Anneriza Tromp, Angela Angela, Shykia Maduro, Quibilah Windfield, Kennylienne Ruiz, Fenishka Ridderstaat, y Iolante Vrutaal.
Algo cu Hubentud den Movecion a haya sa, ta cu mayoria di esnan cu a wordo instala, a cuminza den Scout sea como “Beyisima” of tambe como “Kabouters”.
Manera ta conoci, “Beyisima” ta pa muchanan di 4 pa 7 aña, “Kabouter” ta pa muchanan di 7 pa 11 aña, “PVS” ta pa esnan di 11 pa 16 aña, y “Pionier” ta pa esnan di 16 pa 18 aña di edad.
