Home Policial Mas di 500 persona cu mester pasa examen di rijbewijs digital por...

Mas di 500 persona cu mester pasa examen di rijbewijs digital por haya nan fecha posponi

895
0
SHARE
- Advertisement -

Pa motibo di problema di pago

ORANJESTAD (AAN): Desde cu na Februari di e aña aki a keda introduci e sistema nobo di pasa examen di rijbewijs na un forma digital, hopi a spera un mehoracion den e servicio, specialmente pa loke ta trata fecha pa pasa examen, cu pa añanan largo a yega di tarda hasta entre 10 pa 12 luna.

Cu e sistema nobo, Bureau Examen Rijbewijs a logra bah’e te na 2 luna. Pero den ultimo temponan, personanan cu ta aplica pa pasa nan examen, mester warda varios luna pa haya un fecha atrobe.

Segun Minister di Husticia Andin Bikker mes a yega di expresa den pasado, un di e retonan cu  e mester a atende cune, tabata e tardanza pa pasa examen y como tambe pa otorgamento di rijbewijs. E mandatario a reitera cu un di e prioridadnan di Gobierno aki ta innovacion y den esaki dia 1 di September a introduci un cambio den ley pa haci e parti di teoria di e examen di rijbewijs digitalmente.

Actualmente, rumornan ta core cu tin tardanza di pago na e compania cu ta administra e examen di rijbewijs digital y cu apesar cu uso di e programa a caduca, e compania a bay di acuerdo pa prolonga esaki pa un luna mas. Aparentemente e pago ta pega na Departamento di Finanzas.

For di 1 di September e examen di categoria B a bira completamente digital y Bureau Examen Rijbewijs ta exigi pa tur candidato haci esaki digitalmente, kiermen cu esaki por causa hopi problema pa aplicantenan cu mester haci uso di e sistema  digital. Sin programa no tin examen!

E problema aki por tin consecuencia negativo pa mas di 500 persona cu mester pasa examen digital. Sigur esaki lo trece mas retraso den pasamento di examen, algo cu sigur lo causa disgusto grandi di esnan cu mester pasa e examen, como tambe pa e rijschoolnan.

Ya caba Bureau Examen Rijbewijs tin problema cu falta di personal y tin hopi keho cu nan ta cera regularmente.  Apesar cu esaki tin atencion di Departamento di Minister di Husticia y alto mando policial, ainda no tin un solucion factible pa e problemanan menciona.

- Advertisement -

DUNA COMENTARIO

Please enter your comment!
Please enter your name here