Analisis
Cu prueba DIARIO a rementa e berdad di Citgo
- Gobierno Eman a mara Aruba na un trafico di placa cu Maduro
- Husticia Mericano tin prueba di crimen cometi cu placa na Citgo
Ya pa basta dia por nota un destabilisacion di comunidad di Aruba dor di e grupo di politico cu a hinca Aruba den e pio desastre cu nos pais a yega di conoce.
Awe na un forma directo nos kier haci algun pregunta na Mike de Meza, e persona cu segun su propio partido, tabata genio tras di Citgo.
Awe nos tin un pregunta clave pa Mike de Meza contesta. Su amigo, Nelson Martinez, nunca a yega di bisa su persona como gobernante di nos pais, Aruba, cu Citgo tabata tin problema cu Husticia Mericano?
Esaki ta un pregunta categorico, cu de Meza mester contesta mescos cu tur otro pregunta cu cualkier miembro di e comunidad di Aruba, tin derecho di haci.
Nos mester recorda Mike de Meza cu Aruba ni placa di Aruba ta di su persona, su partido of su gobierno.
Placa di Aruba ta di Aruba y tin ley cu ta regla con ta uza placa di Aruba na bienestar di pueblo di Aruba.
Si awe Mike de Meza por hisa dos dede den laira y hura cu e no tabata sa cu el a hinca Aruba den un aventura ora el a bira promotor di Citgo na Aruba, cu prueba nos ta acusa Mike de Meza di mentira.
Mike de Meza tabata sa cu hunto cu otro miembronan di e gobierno di Mike Eman, el a hinca Aruba den zona di halto riesgo ora el a yega na un acuerdo comercial cu Nicolas Maduro. Nos tin prueba y nos a yega di publica prueba cu ta un acuerdo comercial e tabata tin cu Nicolas Maduro cu a bisa Mike Eman pa no mete den su asuntonan politico na Venezuela, pero pa tene su mes na e acuerdo comercial entre Aruba y su regimen.
Nos ta gaña, Mike de Meza? Bo kier nos bolbe confronta bo cu prueba?
Nos ta bolbe puntra. Nunca difunto Nelson Martinez no a papia cu bo di Husticia Mericano? Bo no a puntra Citgo, ni PDV Holding ni boso propio team pakico Husticia Mericano tabata investiga Citgo ora boso tabata negocia?
Si tabata bo placa personal y bo bienestar personal, lo bo a drenta e aventura cu Nicolas Maduro contra conseho local y internacional?
No ta bo persona tabata splica tur cu a trata di spierta bo gobierno y bo persona pa e riesgonan di e contracto cu Citgo, cu nan ta robes?
Atrobe nos ta puntra: nunca difunto Nelson Martinez no a papia cu bo di Husticia Mericano, cu tabata den su nek?
Bo a sostene y sigui e sostene e proyecto te awe y bo ta haci comosifuera ta otro kier pa e proyecto fracasa. Cual proyecto? E proyecto di Nicolas Maduro cu Rusia y China ta evita di bay bankroet?
Di kico bo ta papia Mike de Meza? Placa a circula entre Citgo y Aruba. Ta un acuerdo comercial bo a cera cu Nicolas Maduro, cu tabata uza Citgo como su baca di lechi.
Atrobe nos ta puntra si nunca difunto Nelson Martinez no a papia di Husticia Mericano, cu awor hunto cu Juan Guaidó ta investiga placa di Citgo pa crimen. E investigacionnan a cuminsa ora boso tabata negocia.
Bo no ta na haltura? Bay puntra Guaidó. Bo no tabata sabi di su existencia ora bo a firma e contracto cu un regimen cu awe Departamento di Husticia di Merca ta investiga pa labamento di placa, ladronicia y placa bou di mesa na Citgo.
Difunto Martinez no a papia di Marisol Gomes cu ta acusa bo grupo di amigonan cu a bini Aruba, di tabata tin relacion cu traficante den droga.
Awor nos mester keda keto? Nos mester bisa Aruba cu ta un gran proyecto bo a trece?
Un pregunta na nomber di Aruba, Mike de Meza: nunca difunto Nelson Martinez no a papia cu boso di Husticia Mericano ora boso a mara Aruba na un trafico di placa cu regimen Nicolas Maduro?
