Mirando aviso di Meteo:
ORANJESTAD (AAN) – Minister di Enseñanza, Ciencia y Desaroyo Sostenible dhr. Rudy Lampe, a encarga cu e conferencia di prensa di gobierno, Diahuebs 19 di September awo.
E mandatario a haci un anuncio relaciona cu e scolnan cu no tin airco ainda, unda e alumnonan ta wordo hopi afecta pa e calor excesivo cu nos pais ta pasando aden e luna aki, vooral e simannan aki.
Minister Rudy Lampe a duna di conoce cu mirando e aviso di Servicio Meteorologico Aruba, su persona hunto cu Inspeccion di Enseñanza, a dicidi pa autoriza cu tur scol cu no tin airco, y teniendo cuenta cu e dianan aki tin demasiado calor, pa haci cambio den e rooster, mas cortico.
E mandatario a menciona no solamente e pausenan di menos duracion pero termina e les pa 11 or di mainta.
Minister Lampe a pidi tur mayor concerni pa tene cuenta cu esaki y na e maestronan tambe, den sentido cu si un alumno no ta wordo busca pa su mayor, nan ta keda te e momento cu e mayor por bin buske, pasobra e mucha no por keda sin guia na e scol.
Minister Lampe a expresa cu, en todo caso, esaki ta un alivio pa e scolnan pasobra ta hopi dificil pa den e calor grandi cu tin aworaki na Aruba, pa por duna les.
Minister Lampe a señala cu ainda no ta tur scol a logra haya airco, pero e mandatario ta conciente cu e no ta un luho mas y e plan ta den ehecucion y den fase pa fase gobierno kier pa tur scol haya e beurt pa haya airco.
E dignatario a indica cu e airco riba su mes no ta e tema di mas importante, sino pa e parti di electricidad, e porta y bentananan unda ta pone e airco ta adecua pa no tin leakmento, y e airco funciona manera mester ta.
E mandatario a agrega cu pesey gobierno a bin cu un plan pa e renovacion grandi di cierto scolnan, locual ta indispensable pa por cumpra e airconan.
Minister Rudy Lampe ta pidi comprension di e maestronan mirando e situacion financiero di nos pais, y teniendo cuenta cu CAft a indica cu PPP Projects no ta posible te cu despues di 2021, y esey ta haci cu e proceso di renovacion grandi di algun scol tin cu warda, te esaki tuma lugar pa e ora ey pone airconan den e scolnan aki.
Mientras tanto, mirando e situacion di calor e dianan aki y te cu otro siman lo bin un aviso nobo, dependiendo di kico Meteo ta indica, e scolnan concerni por caba les pa 11’ or di mainta.
