ORANJESTAD (AAN): Tabata na luna di Maart aña pasa, cu alrededor di 9:45 pm a registra un caso di atraco arma, na Wei Pau Supermarket situa den Caya Danza. Esaki ta un tiki panort di Sasaki Service Station.
Dos homber flaco, color bruin cla, a drenta den e negoshi cu arma di candela den man, a menaza e doño, y finalmente ranca y bay cu e placa cu tabatin den caha. Despues a sali na careda, y uno a bay direccion pazuid y e otro a bay nort.
Di biaha polis a presenta na e lugar y a cuminsa cu un accion di buskeda den e vecindario pa mira si ta logra topa cu e dos atracadornan aki. Pero lamentablemente no a topa cu ningun hende. Polis a tuma tur dato di e victima.
Hasta un cliente femenino cu tabata e momento ey haciendo compras eyden, a bira victima pasobra e atracadornan a ranca un cadena di oro di dje, y tambe a bay cu su tas. Esnan den e negoshi a pasa den susto grandi, y hasta Slachtoffer Hulp a wordo yama.
Di e anochi ey, Atraco Team a cuminza investiga e caso aki. El a dura hopi, pero danki na diferente pista, y tambe grabacion di video a cuminza mik riba un persona cu ta biba den Casnan di Pueblo na Sero Patrishi.
Ora cu a acumula hopi prueba, y cu Fiscal a duna OK, riba Diaranzon mainta prome cu solo a sali nan a presenta cu batayon di agente pa asina detene e persona.
Atraco Team via di vocero di Polis Lito Lacle, a confirma cu nan a detene e sospechoso S.P. di 42 aña di edad, naci na Aruba. E ta mustra di ta envolvi den e atraco di aña pasa na Wei Pau Supermarket.
Segun Polis, e detencion di S.P. a bira detencion #39 di Atraco Team durante 2019. Segun e vocero, di e 39 personanan deteni, 29 ta hende naci na Aruba.
