Home Parlamento Parlamentario Tromp-Lee impresiona cu e Congreso di Famia

Parlamentario Tromp-Lee impresiona cu e Congreso di Famia

43
0
SHARE
- Advertisement -

ORANJESTAD (AAN): Shailiny Tromp-Lee di MEP e siman aki a manda un pabien na henter e team organizador di e prome Congreso di  Famia: ‘Construyendo un fundeshi solido!’ y alavez na Minister Glenbert F Croes cu ta trahando duro pa pone e hende y nos famianan central. E congreso sigur tabata uno exitoso, cu tremendo oradornan.

Ramon Todd Tandare cu a papia di e famianan di antes y awor. Su mensahe na tur presente tabata cu nos Famianan mester parti nan tempo pa tur cos y no laga social media domina bida. Y cu nos mester lanta yiunan pa nan sa kico nan ta haci y pa nan tin nan propio opinion. Algo cu segun Tromp-Lee sigur ta necesario y hopi importante.

Un charla cu sigur a impacta Tromp-Lee tabata esun di Enid de Kort cu a papia di entre otro e 11 tipo di famia, caminda a enfoca mas tanto riba e famia mixto. Mas y mas na Aruba nos famianan ta mixto. Un famia mixto ta un famia cu ta nace a base di casa di nobo of biba hunto entre pareha di cual un of tur dos tin yiunan di un otro relacion.

Famia mixto no ta un famia tradicional. Segun De Kort ta un ilusion pa kere esaki. E famia tradicional ta keda cu e laso di sanger.  Otro punto interesante cu De Kort a presenta ta e 5 lenguahenan di amor. Tur ser humano ta usa esakinan y cada un riba nan mes ta duna preferencia na uno mas cu e otro.

E 5 idiomanan pa expresa  amor ta: duna elogio, tin tempo di calidad hunto, haci gesto/duna regaldo, comparti trabao y contacto físico. Tromp-Lee ta indica cu e tambe ta comparti e preocupacion cu Enid de Kort tin, esta cu social media ta kibrando e conexion entre parehanan y cu mester mas y mas percura pa reenforsa e pareha.

Orador Helen Guda a enfatisa cu nos  Famianan ta e cuna pa tur cos. Mas fuerte nos Famianan ta, mas fuerte nos pais. Nos mester realisa cu tempo a cambia y educacion tambe a cambia. Den e tempo di awe tin cambionan cu impacto grandi p.e. tecnologia y e posicion di  hende muher.

Como mayor nos mester scoge pa ta un mayor consciente door di pone e interes di nos yiu(nan) prome. Nos mester refleha y scoge con bo ta educa nos yiu(nan) pero na mes momento nos mester traha riba nos mes como educador. Bo no por duna bo yiu loke bo mes no tin. Tromp-Lee ta subraya e mensahe di Guda caminda e ta bisa cu ta sumamente importante pa como mayor bo  conecta cu bo yiu, dun’e atencion y ta presente den su bida.

Otro orador ta Sandra Brown cu a papia encuanto un di e problematicanan cu mayoria famia na dado momento ta haye confronta cu ne, esta adiccion. El a papia tocante kico ta adiccion y ki tipo ta existi. Alavez a duna tips con un mayor por señala esaki. A trata diferente ehempel y nan consecuencianan. Segun Tromp-Lee esaki sigur ta un tema cu nos mester sigui duna atencion mirando e impacto cu e tin riba e persona adicto mes pero tambe riba henter su famia.

Ultimo orador tabata Francis Groeneveldt cu a papia di finanzas y famia. Groeneveldt a enfatisa e necesidad pa tur famia mensualmente maneha nan placa a base di un presupuesto cu a keda traha pa e famia henter. Hopi biaha entre pareha y famia no ta papia di finanzas.

Esaki a largo plazo por bira un problema. Segun Groenveldt e di dos motibo di divorcio awendia ta placa. P’esey mes como mayor nos mester educa nos yiunan tocante e tematica aki. Tromp-Lee ta di acuerdo cu Groeneveldt cu ta bisa cu nos mester percura pa siña nos yiunan e basico di placa, con nan mester duna, spaar y gasta, diriginan for di e caminda di debe y mustranan e parti agradabel di placa.

Segun Tromp-Lee tur presentacion tabata hopi bon hinca den otro y e ta spera cu lo tin mas congreso dirigi riba nos famianan, pasobra pa por crea un mihor Aruba nos mester haci posibel cu nos famianan por construi fundeshinan solido. Y e informacion y les compartí durante e congreso sigur ta aporta na esaki.

- Advertisement -

DUNA COMENTARIO

Please enter your comment!
Please enter your name here