Bikker: ta spera cu prome cu fin di aña lo por logra esey
ORANJESTAD (AAN Minister Andin Bikker a reuni cu representantenan di Sindicato TOPA y SEPPA y a defini un ‘Timeline’ pa bay atende cu e reorganizacion den e departamento di Migracion Aruba.
El a indica cu el a combersa cu director di Departamento di Recurso Humano Sra. Lares ariba e tema aki y el a bisa cu nan ta practicamente cla cu un proposicion pa asina minister por bay cune Conseho di Minister y discuti’e prome cu e sindicatonan.
Segun Bikker, e proceso aki ta hopi avanza y su speranza ta cu prome cu fin di aña lo por logra esey y otronan cu ta andando manera esun di Guarda Nos Costa y CEA. Ta logrando esun di KIA cu ta andando desde aña 2012 y unda diferente fase a pega.
El a gradici e sindicatonan TOPA y SEPPA, cu den un aña y 9 luna aworaki ta den un fase cu e reorganizacion di KIA ta kedando cla.
Den e caso di esun di Migracion, e caso a wordo hereda di 2017, pero e proceso a cuminza prome cu esey. Si por logra prome cu December 2019, e ora esey tambe ta un logro cu ta hopi bon pa e empleadonan y e paz laboral.
