ORANJESTAD (AAN): Den fin di siman, Tormenta Tropical Karen a nace den area di Trinidad & Tobago. Sinembargo e NO ta rumbo pa islanan ABC, pero mas bien ta moviendo direccion West-Noordwest.
Esaki nifica cu e ta birando un menaza di hopi yobida pa Islanan Ariba, tambe Virgin Islands, y Puerto Rico.
Diadomingo atardi 5:00 pm, e centro di Tormenta Tropical Karen tabata na 12.9º Nort y 62.7º West, cu ta como 570 kilometer zuid di St. Maarten. Pa Dialuna e lo bira mas Noordwest, y riba Diamars lo bay bira mas direccion Nort.
E centro di e Tormenta pues lo bay move leu di St. Maarten, pero toch e lo por trece awacero ora cu e pasa Diamars atardi como 280 km West-Zuidwest di St. Maarten.
Mayoria di e modelnan di computer ta sugeri cu e lo bay pasa directamente riba Puerto Rico e siman aki. E sistema aki NO ta menaza pa Aruba, pero lo bay trece mas nubia aki riba, y biento cu lo cambia di direccion.
