ORANJESTAD (AAN): Diamars tabata tin un caso di intoxicacion cu a tuma lugar den cushina di Renaissance Convention Center, unda cu hendenan cu ta traha den e cushina a wordo afecta.
DIARIO y otro medionan di prensa a entrevista Comandante di Brandweer Eduard de Cuba, kende a splica cu na prome instancia ambulans a haya un melding cu un señora a bira malo den e cushina preparando cuminda pa e eventonan den Convention Center.
Ora ambulans a yega nan a nota cu tabata tin mas hende cu tabata tin e mesun sintomanan, esta cu wowo y garganta tabata pica, mientras cu nan cabez tabata draai.
“Ambulans mes a pidi nos pa bin wak e situacion, mirando cu posiblemente tabata tin escape di gas den e espacio unda cu tabata wordo cushina”.
“Mesora nos a bin y ya caba personal di ambulans a saca tur e trahadornan di e cushina pafo”.
Esaki segun de Cuba, kende a indica cu personal di ambulans a atende cu tur e trahadornan di cushina, mientras cu Brandweer a bay inspecciona e cushina.
“Nos a ventila e cushina prome cu drenta, pasobra por tabata tin gasnan peligroso den aire”.
“Despues cu nos a ventila, nos a pasa cu nos meternan y no tabata tin nada den aire”.
“Nos a cera tur e valvenan pa evita cualkier peliger”, segun e Comandante di Brandweer, kende a sigui bisa cu e hotel mes despues a cuminza drecha locual a bay robez.
Representantenan di Volksgezondheid tambe tabata presente pa atende cu esnan afecta y examina nan un biaha mas.
Gerencia di e hotel a coopera cu tur e trahadornan y a bisa nan cu esun cu kier bay cas por bay cas.
Lamentablemente 4 trahador cu a sinti nan mes hopi malo mester a bay hospital.
Pa loke ta e gas cu lo a afecta e trahadornan, de Cuba a bisa cu e prome midimento a mustra cu posiblemente ta trata di un combinacion di e gas LPG cu ta wordo uza pa cushina y Monoxido di Carbon (CO).
De Cuba a splica cu e CO por a keda den aire, door cu na dado momento un di e capanan pa chupa aire no tabata trahando.
