Home Religion y Espiritualidad Tur a gosa di “Un Anochi di Historia y Musica” pa observa...

Tur a gosa di “Un Anochi di Historia y Musica” pa observa 60 aña di Misa Birgen di Fatima

62
0
SHARE
- Advertisement -

ORANJESTAD (AAN): Diabierna cu a pasa, Centro di Bario Dakota tabata completamente yen pa e actividad “Un Anochi di Historia y Musica”, e ultimo actividad relaciona cu e di 60 aniversario di Misa Birgen di Fatima. Na yegada tur persona a ricibi un bebida di bon bini, esaki pa kita e calor un poco.

E anochi a inicia cu nos Himno Nacional canta pa tur e cantantenan sigui pa un minuut di silencio pa tur e parokianonan cu a bay nos dilanti. E prome cantante tabata Rev. Pastoor Jairo Maduro y despues a sigui e presentacion di ‘PowerPoint’ di historia di Misa Birgen di Fatima. Den e presentacion nos por a mira entre otro; ponemento di e prome piedra door di Monsegnieur Holterman y tur e Pastoornan cu a yega di guia Misa Birgen di Fatima.

E anochi a sigui cu presentacion di  Juancho Ignacio, Ito Dania, Roy Sneek, Magaly Sneek, Edjean Semeleer, Alfonso Jimenez, Eric Rafael, Max Hassell  y Papito Rafael acompaña pa J-Formation. Tur presente a biba cu e presentacion di e cantantenan y e pista di baile a yena ora cu Papito Rafael a canta ‘Content’i Mirabo’. Tabata bunita pa wak con parokianonan di edad, cu tabata pilarnan di Misa Birgen di Fatima, a disfruta di e anochi. E anochi a clausura cu e cantica ‘Manolo’ cu tambe a yena e pista di baile.

Pastoor Jozef Pelc y e comision organizador ta gradici tur persona cu di un manera of otro a contribui na “Un Anochi di Historia y Musica” specialmente na e cantantenan, e banda J-Formation. E maestro di ceremonia Ruben, Scorpio, Garcia, y Centro di Bario Dakota. Un danki special ta bay na tur medio y miembronan di prensa cu a yuda promove e actividad.  Tambe ta gradici tur parokiano, Dakotero y e pueblo di Aruba en general cu a presencia “Un Anochi di Historia y Musica”. Cu Dios bendiciona boso y recompensa boso!

Y corda cu Dakota, ta resa, Tur Dia!

 

- Advertisement -

DUNA COMENTARIO

Please enter your comment!
Please enter your name here