Home General Un promedio di 3100 persona cu tin un problema cu bista na...

Un promedio di 3100 persona cu tin un problema cu bista na Aruba

75
0
SHARE
- Advertisement -

FAVI ta inicia nan campaña pa yuda personanan cu problema di bista

ORANJESTAD (AAN):  FAVI ta cla pa cuminza cu nan campaña pa haya fondonan pa e personanan cu problema di bista.

Durante un conferencia di prensa, Andrey Kelly, Presidente di e directiva di FAVI a anuncia e inicio di campaña di donacion 2019. Esaki ta un accion cu nan ta tene tur aña. Pa un fundacion por opera mester di fondonan.

A bisa cu nan ta haya cooperacion di gobierno door di subsidio, pero gran parti di nan operacion pa por yuda e clientenan ta wordo haci posibel door di e donacionnan cu nan ta ricibi di comunidad.

E biaha aki FAVI cu nan cuerpo di boluntarionan ta subi caya atrobe pa acerca comunidad y companianan priva pa asina pidi un sosten financiero pa por yega na nan meta.

Actualmente FAVI tin un cantidad di 360 cliente registra. Desde 2010, segun e ultimo Censo, tin un promedio di 3100 persona cu tin un problema cu bista na Aruba, di cual FAVI tin registra 360.

A bisa cu nan ta purba cu e fondonan cu nan ta bay ricibi cu nan por haci nan servicionan posibel, cumpra aparatonan auxiliar y tambe uza un parti di fondonan pa crea mas campañanan di concientizacion.

Charlene Marchena, Guia di actividad di FAVI a agrega cu nan accion di donacion a cuminza dia 29 di Augustus y nan lo bay dura te luna di December. Lo tin colectantenan boluntario cu lo pasa cas pa cas y na cada persona cu ta registra ariba e lista.

E aña aki FAVI ta bay tin un regalo pa tur esnan cu haci donacion. Ta trata di un paña pa haci e brilnan limpi cu e slogan “Ami ta apoya FAVI, Abo tambe?.

FAVI ta celebra e aña aki 45 aña di existencia y esaki ta bay ta un recuerdo pa cada dunado ora nan haci nan donacion, Marchena a splica.

Banda di esaki, esnan cu haci donacion lo haya un prueba of recibo, a bisa.

FAVI ta gradici na tur e colectantenan boluntario cu ta haci e campaña aki uno posibel. E meta ta pa recauda tur e fondonan necesario pa e mantencion di e lugar, pa e actividadnan cu nan ta brinda na e clientenan, pa cursonan, y pa haci e servicio posibel, Charlene Marchena a indica.

E suma cu a pone como meta ta mas cu 80 mil florin, a remarca.

- Advertisement -

DUNA COMENTARIO

Please enter your comment!
Please enter your name here