Home Parlamento A bira tempo pa leynan di medio ambiente wordo pasa na bienestar...

A bira tempo pa leynan di medio ambiente wordo pasa na bienestar y salud di nos hendenan

68
0
SHARE
- Advertisement -

Parlamentario Marisol Lopez-Tromp

ORANJESTAD (AAN): Parlamentario di fraccion di POR, Marisol Lopez-Tromp a elabora riba Ley di Serlimar cu mester a wordo trata den Parlamento, na unda esaki a conoce diferente cambio y naturalmente tin henter un proceso den tratamento di e ley aki, cu por cierto tin basta simannan andando. Tur nota di cambio y/of amienda mester wordo studia pa e parlamentarionan dicidi si nan ta sostene esaki of no.

E parlamentario a bisa cu un aspecto importante pa fraccion POR ta esun di salud. Pasobra despues di analisa e rapport di PAHO, por a wak con toxico, venenoso y con hopi daño e dump ta causa pa henter e area di Parkietenbos y becindarionan. Y como presidente di comision di salud, despues di papia cu habitantenan di e area, e aspecto di salud durante discusionnan ta keda un tiki atras, pero esaki ta e parti di mas cardinal den henter e discusion. E ta enfatiza cu mester cera e dump aki mas lihe cu ta posibel.

E dump mester wordo cera pasobra esaki tin efectonan fatal pa nos flora, nos fauna, pa henter lama, si wak e lagoen eybanda, esey no tin ni bida mas. No papia mes riba e likidonan toxico cu ta bay den tera, e gasnan venenoso, kiermen varios aspecto cu ta trece malesanan. No pa habitantenan so, pa e bestianan cu ta cana cu tur tipo di malesa cu hende por pega of haya, algo cu a yega di pasa caba.

Pa Lopez-Tromp, despues cu el a lesa e rapportnan, henter e discusion riba ken ta bay haci kico, of ken tin cierto interes riba incinerator, ta keda na di dos lugar. Loke ta mas importante ta pa cera e dump y bin cu un solucion ‘once and for all’.

Esaki no ta un topico nobo, el a cay bao di diferente Minister y Gobierno, y cada dia cu pasa cu no ta tuma un paso responsable, cu hopi curashi, pa cera e lugar aki y tuma pasonan necesario riba con ta bay cer’e, cu ta otro discusion. Ta mustra cu parti di placa ta mas importante y e ta rechaza esaki y ta enfatiza cu salud mester keda na prome lugar.

E parlamentario ta spera cu por habri caminda pa mas ley ambiental, pa reforza e leynan, pasobra den rapport tin cierto aspectonan cu no tin ley na Aruba pa regula nan, y e ora ley internacional ta conta. A bira tempo pa leynan di medio ambiente wordo pasa na bienestar y salud di nos hendenan.

- Advertisement -

DUNA COMENTARIO

Please enter your comment!
Please enter your name here