Fiesta di Cunucu na Cas Tan Tin
ORANJESTAD (AAN): Diadomingo ultimo tabata tin e tan spera Fiesta di Cunuca na Cas Tan Tin na Pos Abao 19.
DIARIO tabata presente y a logra haya algun palabra di Minister Xiomara Ruiz-Maduro kende a expresa cu e cas aki ta e unico monumento pafor di e capital. Ta e di 37 monumento cu pais Aruba ta bay conoce y ta e prome cas di cunucu cu ta ricibi oficialmente e seyo como monumento di Aruba.
E mandatario a señala cu Gobierno ta hopi gradici na Monumenten Fonds, Monumenten Bureau y Fundacion Museo Arubano pa nan empeño, na Stichting Mi Cutisa pa nan vision pa cu esaki y mas cu claro Famia Tromp cu a sa di conserva locual ta e cas aki.
Minister Ruiz Maduro a laga sa cu e idea ta cu ora Stichting Cutisa ta asina leu cu e por haya su hendenan cu por atende cu e turistanan, pasobra e lo keda habri, e ora e intencion ta pa por habri no solamente pa local pero tambe pa turismo.
Lo por bisti e pañanan di antes y saca potret di e cas pa por biba e cultura arubiano, a expresa.
Cas Tan Tin a wordo conserva asina bon pa Sra. Faustina Tromp cu e muebelnan cu ta eyden, mayoria ta muebelnan original di e cas, e mandatario a señala.
