ORANJESTAD (AAN): Awe mainta, studiantenan di Filomena College MAVO lo yega y descubri cu nan scol a haya un capa nobo di verf.
DIARIO tabata presente Diasabra mainta na e scol aki, ora cu nan a haya un cantidad di voluntario cu a bin duna un man.
Esaki bao auspicio di Stichting Hunga Teca, cu yudanza di e organizacion “Community Footprints” di Ritz-Carlton Aruba, cu patrocinio di Kooyman a haci un make-over di scol.
E voluntarionan a yega pa asina verf, planta mata, y embeyece e scol aki. Algo di aprecia ta e hecho cu Departamento di Maintenance y Gardening di Ritz-Carlton a traha bakinan di mata pa asina e alumnonan di e MAVO scol aki por siña planta y mantene un hardin.
Nan a verf e veld di Volley, e veld di Basketball, y veld di Futbol. Tambe tin plan pa traha un Gazebo pa ofrece sombra pa e muchanan. Kooyman ya caba a haci donacion di tur e material pa esey, segun un vocero di Kooyman a splica.
Jouraine Vrolijk di e directiva di Community Footprints di Ritz-Carlton, a splica cu nan a bay yuda cu voluntario pa verf y embeyece e scol. Nan a yega cu un grupo di casi 40 voluntario di mainta trempan pa asina haci e trabao. A splica cu hasta un trahador femenino di e Casino na Ritz-Carlton cu a caba di traha 4:00 am, a yega na e lugar banda di 6:00 am, cla pa contribui.
Yamila Hoevertsz-Kock di Stichting Hunga Teca na su turno a splica cu nan ta hopi agradecido, pasobra tin hende di Community Footprints cu a traha den casino di Ritz-Carlton te 4:00 am, y ya caba pa 6:00 am tabatey pa asina yuda cu e proyecto di voluntario aki.
Stichting Hunga Teca ta bay concentra pa muchanan di Aruba por bay fia juguete for di nan. Tambe despues di vakantie lo bay pasa scol pa scol pa duna informacion, pa splica ken nan ta, kico nan ta haci, y con por bay fia juguete educativo.
