Eduard de Cuba, comandante di Brandweer
ORANJESTAD (AAN): Cuerpo di Bombero tambe tin nan preocupacion relaciona cu e temporada di awacero na Aruba.
Eduard de Cuba, Comandante di Brandweer a indica cu aworaki cu awa ta yobiendo casi tur dia, tin bon contacto cu Meteo Aruba, y asina ta pone e departamento bon na altura di kico ta pasando y kico ta e pronosticonan.
A ripara cu tin hopi caminda aworaki cu cambionan a wordo haci ariba e caminda mes door di Departamento di Obranan Publico (DOW).
Ora awa ta yobe tin hopi awa ariba caminda, pero e awa ta core bay sea den un dam of rooi. Ora awa cay duro mester tin un tiki pasenshi, laga e awa core un rato pa asina e por disipa y wak kico ta e problemanan.
De Cuba a remarca cu esey no ta kita afo cu Brandweer ta prepara pa cualkier emergencia, ya sea caminda cera pa motibo di inundacion, accidentenan, etc, unda e personal por actua ariba dje.
