Dump ta un centro di malesa peligroso

    210
    0
    SHARE
    - Advertisement -

    Cada dia sin solucion ta mas bida directamente na peliger

    Parlamento mester dicidi riba suela, aire y lama contamina

    ORANJESTAD(AAN)–Huma, posibilidad di candela grandi of explosion, holo y insecto ta algun di e problemanan cu a wordo mara na e presencia di e dump na Parkietenbos.

    E rapport di Ingeniero Leonardo Sandoval cu ta experto di e organisacion mundial di salu, WHO, y tambe di e organisacion Pan Americano di Salu, PAHO, ta pone un luz riba e realidad grandi di peliger cu ta presente na dump na Parkietenbos.

    Diariamente e enemigo di salu di Aruba ta wordo alimenta cu mas sushi peligroso pa salu di hende.

    DIARIO a tuma nota di e rapport extenso cu ta confirma e motibo cu rond mundo ta tuma paso contra tur luga cu tin acumulacion di sushi.

    Publico generalmente tin un problema pa realisa e grado di sushedad na dump na Parkietenbos. No ta trata aki di sushi cu ta bini di vivienda y oficina. Ta trata aki di sushi cu ta bini di laboratorionan.

    E sushi cu ta wordo saca for di e instalacionnan pa purifica awa, ta bay dump hunto cu material peligroso di cual industria mester deshaci.

    Tur ta wordo deposita na dump na Parkietenbos, caminda suela, aire y lama ta wordo contamina.

    E rapport ta splica puntonan cu hopi bes pueblo no conoce. E sushi ta bay den suela di Aruba y asina por contamina e awa den suela di Aruba. E ta contamina lama cu tur resultado cu esaki tin atrobe pa medio ambiente y ta afecta e calidad di aire cu hende ta respira.

    Ta conoci cu dump ta motibo pa hopi problema di pulmon na Aruba. Pero e situacion cu a crece den curso di añanan, a bira un peliger fuera di tur dimension.

    DIARIO cu continuamente ta publica relatonan di e organisacion mundial pa Salud. WHO, ta topa cu condicionnan cu e organisacion mundial ta considera di daño serio pa salu humano.

    E hecho cu sushi di institutonan medico por ehempel ta resulta na dump, ta nifica un peliger grandi cu no por existi segun organisacionnan di salu den comunidadnan desaroya.

    Enfermedadnan serio hopi bes ta resultado di medio ambiente y sushedad.

    E rapport cu DIARIO a ricibi ta duna indicacion cla cu solucionnan mester bini riba termino corto y no por tarda mas.

    Na 2017 tabata tin un candela feroz na e dump y e tempo ya gobierno anterior a duna di conoce cu mester yega na un solucion riba un termino hopi cortico. Nada a pasa mas e tempo.

    Mientrastanto cada dia ta bira importante pa salud di hende, cu por demanda gobierno pa tuma si e no tuma accion manera a pasa na St. Maarten.

    Aruba cu ta atende cu turista, mester tene cuenta cu e rapport cu experto di PAHO a presenta. Relatonan riba salud ta wordo sigui tambe dor di companianan cu ta atende cu turista, cu den tempo actual, ta duna hopi atencion na factornan di medio ambiente, sushedad y salud.

    Parlamento mester bay dicidi riba un peliger enorme cu a sali for di man na Parkietenbos. Relato di expertonan no ta laga na duda.

    - Advertisement -

    DUNA COMENTARIO

    Please enter your comment!
    Please enter your name here