Home Editorial E responsabilidad di comunidad y ciudadano den e lucha contra cancer

E responsabilidad di comunidad y ciudadano den e lucha contra cancer

28
0
SHARE
- Advertisement -

Editorial

Dia 3 di December 1967 tabata un fecha masha grandi pa mundo. Profesor Christiaan Barnard a realisa e prome transplante di curason. Mundo a conoce un adelanto medico grandi den e lucha contra enfermedad cu e descubrimento di penicilline ya a mara na speransa nobo pa bida mas largo.

Siglo 20 a conoce desaroyo explosivo den combatimento di enfermedad y logro medico. E reto mas grandi pa hende a keda cancer, e proceso den cual celulanan maligno ta propaga den curpa humano y ta bira origen di un desaroyo doloroso y sufrimento grandi tanto pa e pashent como pa tur hende cu ta sinti nan mes impotente pa alivia e angustia di e victima di e malesa.

Mientras mundo cientifico ta sigui lucha pa haya un cura pa e proceso di cancer, hende ta sigui descubri factornan cu ta causa e enfermedad. E descubrimentonan di loke ta causa e enfermedad horibel, a duna hende e arma di mas grandi pa lucha contra cancer pafo di laboratorio.

Tin cancer cu lamentablemente hopi bes no ta anuncia nan mes na tempo pa hende por tuma pasonan necesario. Cierto tipo di cancer ta presenta nan mes den un fase cu por considera terminal. Na momento di diagnosis dokter por duna fecha di morto.

Sinembargo, mas y mas mundo ta haya oportunidad pa evita inicio y progreso di cancer.

Ora analisa loke ta yuda produci cancer sigur cerca personanan cu un historia di cancer den nan famia, ta topa cu factornan cu ta contra e naturalesa humano. Humamento, bebida, contaminacion di e aire cu nos ta respira, mal custumber di alimento, falta di responsabilidad di chekeo medico, ta algun di e factornan cu ta yuda avance di enfermedad y sigur cancer.

Por actua contra varios tipo di cancer cu por wordo descubri na tempo pa haya yudansa. Cancer na pecho por ehempel por wordo remedia si e pashent ta na tempo.

Esaki ta rekeri pa na un pais, e comunidad ricibi informacion riba prevencion di cancer. Maneho adecua ta exigi un cuido medico cu ta tene cuenta cu e riesgonan cu un pashent ta core ora e mester ta lunanan largo riba lista di espera di un specialista sin por haya un consulta.

Un maneho contra cancer den un comunidad, ta exigi instrumentonan moderno, posibilidad pa e pashent haya tratamento den exterior si e pais no ta dispone di e ekipo humano of tecnico pa atende contra e tipo di cancer.

Organisacionnan y instancianan cu ta haci publico consciente di e peliger pero tambe e medidanan contra cancer, mester haya sosten di gobernacion. Placa di comunidad  mester wordo uza efectivamente den e bataya contra cancer cu gobernantenan mester duna prioridad riba gastonan cu no ta sumamente necesario.

Comunidad y gobernacion mester duna guia na ciudadanonan y percura pa presencia di tur loke ta necesario pa combati cancer y pa yuda e pashent di cancer.

Tin un tereno habri na nos pais pa ainda traha riba e factornan esencial pa hunto nos por lucha contra e enfermedad cu ta causa asina tanto dolor y sufrimento diariamente y ta corta bida precioso cu nos por scapa.

DIARIO lo sigui brinda sosten na tur organisacion y instancia den nos lucha contra cancer y lo sigui presenta necesidadnan pa hunto nos avansa den direccion di logro medico, cu ta reduci e lagrimanan y angustia causa pa cancer.

- Advertisement -

DUNA COMENTARIO

Please enter your comment!
Please enter your name here