Home Editorial E yabi di refineria ta bolbe den man di Aruba

E yabi di refineria ta bolbe den man di Aruba

103
0
SHARE
- Advertisement -

Editorial

Ta hustamente un aña pasa, cu DIARIO a cuminsa splica e pueblo di Aruba, cu mester lubida e proyecto Citgo. Como e matutino di Aruba, cu a nace pa lucha pa e bienestar di e Arubiano, nos a dicidi pa un inventario nobo pero completo di tur desaroyo den  Citgo.

Na momento cu nos a lansa e berdad pa Aruba, nos tabata consciente cu no tabata nada facil splica Aruba cu e proyecto cu a wordo introduci na 2016 como salbacion economico di Aruba, tabata realmente un di e riesgonan mas grandi cu un gobierno por a tuma pa un pais.

Nos mester a kibra e baricada cu e presentacion espectacular di e proyecto Citgo a nifica. Nos mester a registra cada suceso y cada desaroyo di pasado, mescos cu spiraal cu tabata bay laira pa forma un desaster pa futuro di Aruba.

Tabata evidente cu e cambio di gobierno na 2017, a evita cu Aruba sin refineria lo a bira un asilo pa e grupo di Nicolas Maduro, scondi den e secresia cu for di e introduccion, tabata berdad di e proyecto.

Nos dilanti nos a tene e gran confiansa di pueblo di Aruba den DIARIO loke tabata nos animo pa deshaci di e mundo di fantasia den cual gobierno anterior a hinca Aruba pa asina por a habri porta pa un futuro nobo.

Nos a bay contra biento y marea pa splica Aruba e resultadonan di e incertidumbre total cu cada dia di Citgo na Aruba, tabata nifica pa e pais.

Awe, algo grandi a sosode. Manera te cu ayera nos a informa, Citgo na Merca ta lucha pa por sigui existi despues di fin di October. Citgo, cu Nicolas Maduro a mara como borg na prestamonan cu el a haci na 2016 ora Aruba a firma e acuerdo, ta core riesgo cu e luna aki e ta cambia di doño.

Kico lo a pasa cu Aruba? Kico lo a pasa cu combustibel pa nos mercado local? Kico lo a pasa cu nos instalacionnan manera e terminal di azeta, cu sigur ta sumamente importante pa nos economia?

Na momento cu nos a ricibi e informacion cu e yabi di refineria ta bolbe Aruba, nos a hubila. Aruba no a perde un proyecto, pero Aruba a pone fin na un aventura cu no tabata mara na e medidanan di Merca contra Venezuela. E desastre di Citgo tabata presente for di momento cu gobierno anterior, den secresia hasta pa Parlamento, a firma e acuerdo cu Nicolas Maduro.

Awe e yabi di refineria ta bolbe cas. E ta bolbe Aruba, cu awor por deshaci di incertidumbre y subi un caminda nobo pa reanima nos economia.

Nos ta felicita Prome Ministro Evelyn Wever-Croes cu a duna prueba di responsabilidad como gobernante.

Hunto cu Aruba nos ta dal un paso dilanti pa e macutu di posibilidad cu ta habri pa nos Aruba Dushi Tera.  Esaki tabata motibo di nos esfuerso pa entrega Aruba e berdad di proyecto Citgo y cumpli cu nos responsabilidad enfrente nos pueblo.

 

- Advertisement -

DUNA COMENTARIO

Please enter your comment!
Please enter your name here