Minister Rudy Lampe:
ORANJESTAD(AAN): Diahuebs Minister di Enseñansa Rudy Lampe a anuncia cu e siman aki a keda funda e Stichting Leerorkest Aruba, cu ta den cooperacion Stichting Leerorkest Amsterdam.
“E meta di e fundacion aki cu apoyo di Hulanda ta pa nos reintroduci les di musica den nos scolnan”.
“Den temponan antiguo algun mil aña pasa y despues den edad media, musica tabata un vak cu tabata tin mesun balor cu wiskunde”.
“Ta despues e cambionan a bin y el a bay mas atras y nos a ripara cu na Aruba nos tin cu reintroduci e vak di ‘muziek’ den nos scolnan”.
Esaki segun Lampe, kende a sigui bisa cu den prome instancia ta bay bin cu esaki como un actividad extracurricular.
E mandatario a sigui bisa cu e fundacion tabata necesario tabata necesario, pasobra e fundacion ta bay ricibi donacion di instrumentonan segunda mano di musica cu tur aña ta wordo colecta na Hulanda.
“Miles di instrumento ta bay wordo poni disponibel, pa asina nos muchanan siña toca instrumentonan musical”.
“Den prome instancia lo cuminza cu lesnan di canto, pa despues bay over den siña e muchanan toca un instrumento musical”.
Esaki segun Lampe, kende a indica cu lo cuminza cu 4 scol piloto y cu den cooperacion cu Minister Andin Bikker e proyecto ta bay wordo impulsa, pasobra e prome donacion pa Stichting Leerorkest Aruba ta bin di Ministerio di Husticia di Hulanda.
“Nos tin hopi espectativa di e proyecto aki y e siman aki caba e stichting ta un realidad, unda cu na diferente scol nos a cuminza caba cu les di musica, cu ta bon pa e desaroyo cognitivo di e muchanan”, segun Lampe, kende a indica cu e prome indicacion cu el a haya for di e maestro, e alumno y e mayornan ta cu tin un entusiasmo grandi pa esaki.
E mandatario a bisa tambe cu e siman aki a ricibi for di Hulanda dos container cu materialnan educativo segunda mano pa e scolnan na Aruba.
“Ta trata di materialnan di Montessori cu ta hopi caro y nos ta bay stimula como parti di nos maneho, scolnan Montessori”.
“E siman aki na Aruba ta tumando lugar certificacion di nos maestronan cu a sacrifica nan vakantie, pa wordo certifica como ‘Montessori Teacher’”.
“Nos a busca expertonan di Hulanda cu ta dunando e cursonan na e momentonan aki, cu tin e filosofia di educacion personaliza”.
“Cada mucha ta diferente, pues bo ta duna cada mucha su estudio segun su ritmo y talento”, segun Lampe.
