FPNM a duna un charla tocante termento: kico e ta y con pa atende cune

    201
    0
    SHARE
    - Advertisement -

    Felishah Ponson den Luna Nacional di Prevencion di Bullying:

    ORANJESTAD (AAN) — October ta e Luna Nacional di Prevencion di Bullying, y en conexion cu esaki Fundacion pa Nos Muchanan a duna un charla recientemente.

    Felishah Ponson, Consehero Pedagogico di FPNM, a menciona cu na prome lugar el a splica kico ta termento.

    “Termento ta un forma di tenta hopi agresivo cu ta keda ripiti y mayoria di biaha esaki a sosode cu muchanan cu ta bay scol, y e ta sosode ora adultonan no ta presente of no ta wak.

    Sra. Ponson a señala cu tambe e ta un forma di intimida un mucha fisica y emocionalmente. El a indica cu tin diferente manera di termento: fisico, verbal, emocional y aworaki e “Cyber bullying” cu ta via internet, via media, usando tecnologia. Otro forma di termento ta door di uza diferente señal y tambe mensahe.

    Semper tin mas cu un causa di termento. Algun cu Ponson a menciona, ta cu posiblemente e mucha cu ta ter ta bibando den un ambiente menos agradable, e ta imita loke e ta wak den su ambiente, e por ta un victima di abuso y pesey e ta ter, of podise e no ta haya suficiente atencion na cas for di su mayornan, y e ta busca un otro manera pa haya atencion. Of e kier forma parti di un grupo, of mustra tough (duro) dilanti su amistadnan.

    E Consehero Pedagogico di FPNM a subraya cu semper mester tuma termento na serio. Unda cu sea cu e ta tuma lugar, semper ta importante pa desaproba e termento.

    Tambe ta hopi importante pa scucha e muchanan ora un mucha bin cerca un adulto, confie cu informacion, of un situacion cu e ta aden, si e tin problema cu termento sea e mes, of si e ta wak esaki na scol mester tuna nan na serio, scucha nan y basa den loke nan bisa, tuma accion riba e asunto.

    Bisa nan cu ta ok pa papia riba termento. Pa ta habri pa papia riba e tema aki, y no keda keto dilanti un situacion di termento.

    E dama a subraya cu ta hopi importante pa splica e mucha kico e por haci, unda e mester bay, cu ken e por papia den un caso asina sea cu e mes ta den dje of otro persona.

    - Advertisement -

    DUNA COMENTARIO

    Please enter your comment!
    Please enter your name here