Resumen
Acuerdo tabata “fastball” constitucional na Venezuela tambe?
*Caso debe cu ta menasa futuro Citgo a bira hopi interesante
*Acuerdo Citgo tabata tin mester aprobacion Asamblea Nacional?
Ta parce cu e parti final di e acuerdo entre Aruba y Venezuela pa loke ta trata e proyecto Citgo, por haya un buelta sumamente interesante si e Presidente Interino di Venezuela mantene su mes riba un linea.
Un asunto cu sigur tin atencion di informantenan di DIARIO cu a conduci e forma cu nos por a tene Aruba informa riba e proyecto cu a rementa den cara di Aruba, ta e caso nobo cu Hues na Merca mester atende.
Por conclui cu Corte na Merca tabata sumamente ocupa cu tantisimo caso penal den asuntonan di Citgo prome cu Juan Guaidó a bini dilanti den e panorama politico di e pais. Casonan penal a sigui nan curso pero riba tereno civil, situacionnan nobo ta presenta.
Manera semper DIARIO a indica, na momento cu Nicolas Maduro y Mike Eman a firma e acuerdo cu a uni e regimen di Maduro cu Aruba, Nicolas Maduro a mara futuro di Citgo na debe. Maduro a hipoteca 49.9 porciento di Citgo cu Rusia pa cubri debenan existente entre Venezuela y Rusia. Na mes momento Maduro a uza e resto di e propiedad pa haci un debe pa su regimen cu Citgo como borg pa e resto di e propiedad.
Awe Venezuela mester paga e debe di casi Un Miyon (1000 Miyon) of perde e parti di Citgo na e grupo tras di e fiansa of perde Citgo den tempo corto.
Gobierno Mericano a duna Guaidó poco mas tempo pa soluciona e asunto. Grupo Guaidó a dicidi cu nan ta bay Hues a base di e hecho cu e prestamo a wordo logra sin aprobacion di Parlamento (Asamblea Nacional) di Venezuela.
Observadornan cu for di e prome momento cu gobierno Mike Eman a bula den boto di Nicolas Maduro tabata tin miedo pa e resultado, awor ta expresa otro temor.
Aruba a yega na un prome areglo cu Citgo pero ainda mester regla basta asunto importante, manera responsabilidad di Citgo na momento di despedida cu Aruba.
Instancianan oficial di Aruba tambe a adverti pa problemanan cu por a surgi pero gobierno Mike Eman tabata tin un ansha pa pasa e acuerdo debi na e situacion pio cu malo cu Aruba tabata conoce na 2016.
A base di loke ta pasa actualmente na Merca, observadornan ta mustra cu Guaidó por bay reclama cu e acuerdo Citgo tabata un fastball constitucional na Venezuela tambe.
Na Aruba e forma cu e acuerdo a wordo atendi cu Parlamento a trapa riba tur ley ya cu Parlamento a wordo poni bou curatela. Mike y Nicolas a firma sin puntra opinion di Parlamento, cu a haya su mes dilanti un hecho cumpli.
Aparentemente Parlamento di Venezuela tampoco a aproba e acuerdo. Kico por pasa? Guaidó por dicidi cu acuerdo Citgo ta fantasma pa Asamblea Nacional di Venezuela tambe?
Kico ta resta di Citgo prome cu acuerdo Citgo Aruba pasa pa historia?
Un pregunta den hopi pregunta. Pasobra segun observadornan, gobierno anterior di Mike Eman a duna muestra cu den e mundo politico di Aruba tambe hopi cos ta posibel.
