Director di Serlimar durante reunion na Parlamento:
ORANJESTAD (AAN): Diaranzon mainta den Parlamento a inicia e tratamento di e Ley di Serlimar. DIARIO a combersa cu Director di Serlimar, Henley Davelaar kende a expresa cu esaki tabata un dia crucial.
El a indica cu esaki ta un ley existente cu ta wordo adapta. “No ta un ley nobo cu ta wordo crea awe”, a bisa. E controversia ta wordo crea for di sector priva.
Segun Davelaar, Minister Otmar Oduber a hiba un discurso hopi cla cu tur hende por a compronde. Tin basta hende caba sacando e mensahe den medionan di comunicacion di kico ta e motibo y kico ta e importancia di e ley aki.
E ta kere cu controversia ta un cos mundial y semper ta bay haya e tipo di casonan aki. Pero nan ta kere cu e mensahe a yega na e pueblo, parlamento y cu tur hende ta mira e necesidad y importancia di e ley aki, a indica.
E director di Serlimar a duna di conoce cu mester tene na cuenta cu e parti di procesamento y maneho di desperdicio, cual na final di dia ta yega cerca Serlimar.
Tin Parkietenbos y Seroe Tijshi. Tur compania por handle sushi pero na final di dia nan ta yega cerca Serlimar. E gastonan di mantene Parkietenbos y Seroe Tijshi ta hopi mara na nan. Ekipo, cobamento, personal, e becindario, etc, Davelaar a laga sa.
Teniendo na cuenta e parti humano tambe pesey ta importante pa tin e fondonan pa haci e maneho di desperdicio na un manera responsabel cu ta baha e cantidad di kehonan den e becindario, a splica.
No kier pa ningun ciudadano tin malesa pa despues bira un epidemia. Esaki ta e cosnan cu por ehempel, kier. E heffing di turismo, di companianan di Camara di Comercio, di modo cu ta haya e fondonan necesario pa duna gobierno espacio pa uza e fondonan cu tabata tin liber, pa por inverti den metodonan duradero manera un incinerator grandi.
E idea ta pa e fondonan aki yuda baha e subsidio di gobierno na Serlimar di modo cu gobierno por uza e parti ey pa inverti den metodonan duradero, a reitera.
Henley Davelaar a indica cu a duna caba un presentacion na Raad van Advies, Parlamento a haci su preguntanan y a yuda Minister Oduber contesta e preguntanan. E por parce un ley complica, pero manera cu a hiba e mensahe den prensa e ta duidelijk pa tur hende aworaki.
Tin algun nota di cambio cu ta bin acerca cu ta cosnan valido. El a menciona por ehempel e hendenan cu tin un eenmanszaak y cu ya caba ta pagando e 25 florin na nan cas y cu no ta husto pa nan tambe bay paga e heffing di comerciante.
Esey entre otro ta un nota di cambio, a bisa.
