Home General Mester cambia Ley di Eleccion di Aruba

Mester cambia Ley di Eleccion di Aruba

577
2
SHARE
- Advertisement -

Ministro y Parlamentario ta trabou cu menos exigencia

*Sistema politico ta basa riba partido como participante

*Solamente ocho punto cu por stroba candidato pa Parlamento 

ORANJESTAD  (AAN) — Kico a bay robes cu e sistema di gobernacion na Aruba cu awe ta entrega Aruba un situacion horibel pa soluciona? DIARIO a discuti e puntonan aki cu expertonan cu a presenta e asina yama “Kiesverordening” na DIARIO. Ta trata aki di e ley cu ta dicidi kende y con ta participa na eleccion pa dirigi e pais.

Pa increibel cu por parce, casi no tin punto pa stop un persona pa bira Miembro di Parlamento cu ta dicidi kende ta bira Ministro cu tampoco conoce exigencia mucho halto.

Pa hende pa medio di partido bira gobernante y asina dirigi e pais, e mester subi un lista politico. Como candidato e ta haci propaganda pa su mes y ta priminti pueblo cielo y tera pa haya popularidad cu ta resulta den voto. Despues e ta hura cu e no a priminti ningun hende algo.

“E problema mas serio pa drenta Parlamento te awor ta e placa cu partido politiconan mester paga pa participa na eleccion y e cantidad di firma cu nan mester haya di pueblo.  E placa aki mester wordo poni riba mesa. Si no haya e cantidad di voto pa sostene lista, e placa ta bolbe pa partido,” a wordo treci dilanti.

E sosten pa partido participa na eleccion a bira un punto cu no necesariamente ta indica cu pueblo ta tras di un partido of un candidato.

“Pa haya hende sostene e lista, e partido mester haci su mes popular. Mescos cu durante eleccion e ta haya voto, e ta busca votado pa sostene su lista. Esaki no ta garantia cu e por ni haya un asiento den eleccion,” a wordo treci dilanti.

Prueba di e posicion aki ta, cu ora partidonan grandi haya e cantidad di voto cu nan mester como sosten pa participa na eleccion, nan ta laga nan sostenedonan bay sostene lista di contrincante politico cu no tin suficiente sosten pa bay eleccion.

Den henter e sistema, e candidato su siguridad pa haya un bon puesto no ta bini di pueblo, pero di e partido cu ta pone candidato riba lista.

“Tin candidato cu pueblo no kier mira. Pero nan ta riba un lista di un partido popular y asina ta drenta Parlamento cu chens di bira Ministro,” a wordo treci dilanti.

Pa bira candidato ta masha facil. Manera experto ta remarca cu simplesa, ta mas facil pa bira Miembro di Parlamento of Ministro cu pa haya e trabou di mas humilde den pueblo.

Segun ley di eleccion participacion riba lista ta exigi masha poco. Nomber, adres, fecha di nacemento y luga di residencia, mester wordo presenta. E dama mester duna su nomber di famia  soltero y casa. E candidato mester bisa cu e ta di acuerdo pa bay riba lista y no por aparece riba mas lista.

Si autoridad descubri cu un hende a muri, ta scrap su nomber y tambe si resulta cu tin mas candidato cu ley ta exigi riba un lista.

Un persona cu no ta mentalmente capaz of segun Hues no por participa na eleccion, tambe ta wordo exclui.

E paga y beneficionan di un puesto politico ta enorme pa no papia mes di e responsabilidad pa un pais cu e persona ta carga.

Segun informantenan ta partido ta participa na eleccion y ta partido ta dicidi con e ta investiga su hendenan riba lista.

Mientras awor ta bay propone pa cambia ley kende ta bira Ministro, informantenan ta di opinion cu mester cuminsa studia posibilidad pa sin mishi cu democracia pero hustamente sirbi democracia, cambia Ley di Eleccion.

DIARIO lo presenta mas informacion den proximo edicionnan.

- Advertisement -

2 COMMENTS

  1. Ta jega e momento cu mester cumisa ataca e problema di nos democracia, pasobra no por spera un gobierno di calidad si no tin democracia di calidad, cu aworaki na Aruba no tin. Pero no ta cos di awor pero di momento cu Aruba a hanja su status aparte den Reino Hulandes.
    Mi opinion ta cu democracia ta termina ora resultado di eleccion keda publica, pasobra e ora partidonan ta cumisa negosha cu voto.
    Na mi humilde opinion mester cambia ley di tal manera cu defacto tin dos eleccion uno ta pa miembro di parlamento y otro ta pa prome minister.
    Di tal manera prome minister ta scohe su cabinete y ta keda responsabel pa SU cabinete cu ta habri caminda pa personanan cualifica por wordu nombra como minster sin cu mester tin alliansa of lealtad na un partido, pero solamente na ejekushon di e programa di gobernashon controla pa parlamento na un manera professional y conforme reglanan di bon gobernashon.
    Pa loke ta miembro di parlamento mester jega na un formula cu ta otorga representashon den parlamento na candidatonan mas vota y NO na e listanan mas vota, pasobra te ahinda nos ta vota pa candidato pa representa nos den parlamento y no pa partido. lo no ta un mal idea pa asina tin representashon den parlamento segun districto.
    Tambe por pensa pa presupuesta gastonan di CAMPANJA pa partidonan politico for di caja di gobierno caminda tur partido ta hanja un suma destina pa e candidato riba lista.
    Esei lo contribui na transparencia y envolvi comunidad mas den mejora calidad di politica.
    Naturalmente e ta subi gasto di gobierno, pero mester corda cu nos derechonan no ta gratis y nos gobernashon mester ta di nos y pa nos.

  2. Mester laga Pueblo eligi ministernan y parlamentarionan y promer minister. Unico manera pa elimina politica di friends & family y stop corupcion na Aruba despues di 33 anja di MALgobernacion!

DUNA COMENTARIO

Please enter your comment!
Please enter your name here