ORANJESTAD(AAN): Mirando cu nos leynan ta anticua, algo mester wordo haci, pasobra e speed di gobernacion, ta e speed den cual bo por update bo leynan.
Lamentablemente tin un capacidad limita di cuanto persona nos tin cu ta hurista y tin e experticio pa update nos leynan.
Esaki segun Minister di Husticia Andin Bikker kende a indica cu for di 2014 e tabata presenta varios idea for di den Parlamento, unda cu e idea ta pa mas hende mester bin pa update nos leynan.
“Den cuadro di e acuerdo di gobernacion nos a bisa cu nos kier bin cu un academia di ley y Diaranzon mi tabata hopi contento di por a reuni cu Flora Goudappel, kende ta e Decano di e facultad di ley di Universidad di Corsow, caminda cu entretanto na Maart nan a institui un ‘Leerstoel’ pa Profesor Sjoerd Zijlstra, kende ta un persona di Universidad di Amsterdam”.
“E ta un experto riba e arte di traha ley”.
Esaki segun Bikker, kende a indica cu e persona aki tin e experticio di instrui personanan con nan por traha ley.
E mandatario a splica cu locual ta bay tuma lugar den e simannan cu ta bin ta cu ta bay concipia un memorandum of understanding, caminda cu lo delinea un acuerdo pa por yega na un cooperacion cu e instituto, esta Universidad di Corsow, pa loke ta e academia di ley,
“E intencion ta pa nos yega na un tipo di academia di ley aki na Aruba”, segun Bikker.
