Home Economia Minister Ruiz-Maduro papiando ariba e situacion financiero actual di Pais Aruba

Minister Ruiz-Maduro papiando ariba e situacion financiero actual di Pais Aruba

219
0
SHARE
- Advertisement -

ORANJESTAD (AAN) – Minister Ruiz-Maduro ta brinda informacion riba e situacion financiero cu Aruba ta aden actualmente pa asina por tin un debate sano riba e realidad.

E lastiek no por rek mas

Te ainda hopi hende no kier comprende cu Aruba tin un problema financiero cu tin cu wordo atendi y resolvi, ya cu no tin espacio mas pa e ‘lastiek por rek mas.’ Nos mester realisa cu e tempo cu bo ta djies bay un tiki mas den ‘rood’ a pasa.

Aruba mester pone orden den su cartera ya cu no tin espacio mas pa haci debe. Aruba su debe ta core den 4 mil miyon florin y esaki ta pone demasiado presion riba e cartera di Gobierno y Pueblo en general.

Mas deficit, ta mas peso di debe

Den presupuesto di Pais Aruba e gastonan mas grandi ta gasto di interes di debe y gasto di personal. Tanten cu e presupuesto conta cu deficit, e buraco aki lo mester wordo cera door di traha un debe nobo y cune mas gasto di interes.

Ta pesey ta hopi importante pa Gobierno cuminsa presenta presupuesto cu tin surplus pa asina no mester fia placa pa crea debe nobo pa por sera e buraco di un deficit.

Den un situacion di surplus Gobierno por fia djis pa por refinancia debe existente y cuminsa traha a base di un maneho di debe pa reduci e peso di interes riba e presupuesto di Pais Aruba.

Yega na surplus no ta facil

Gobierno na 2018 den un Memorando Financiero Economico (FEM) a fiha un caminda pa cana pa por yega na presenta presupuesto cu surplus pa Aruba. Segun e FEM pa aña 2020 Gobierno mester presenta un presupuesto pa Pais Aruba cu un surplus di 25 miyon.

Compara cu presupuesto 2019 cu a conta cu un deficit di 25 miyon, esaki ta significa un diferencia di 50 miyon cu mester yega na dje door di un combinacion di entrada extra y menos na gasto pa por yega na e meta di presenta un presupuesto cu surplus pa cual no mester crea debe nobo pa cubri deficit.

Pa yega e surplus aki no ta facil, ya cu den 2020, banda di e gastonan fiho haci den 2019 y den e añanan promer cu esaki, tin gasto nobo ta bin acerca manera gastonan relaciona cu proyectonan Private Public Partnership cu ta keda finalisa y pa cual mester cuminsa paga. Gastonan creciente di AZV tambe ta keda un reto.

Awor tin norma pa gasto di personal

Pa locual ta e otro gasto grandi di Gobierno cual ta gastonan di personal, den e Protocol cera cu Hulanda na november 2018, a stipula un plafond di 479 miyon florin. Esey ta e suma di gasto di personal den presupuesto di 2019 y e maximo cu a keda acorda entre Aruba y Hulanda cu por wordo gasta na gasto di personal den e tempo nos dilanti.

Aruba den e FEM a indica di traha na baha gasto di personal tur aña cu 3 miyon florin, locual ta trece cune cu varios decicion riba e tereno di personal mester wordo tuma pa baha gasto. Entre nan, pa aña 2019 y 2020 Gobierno no por yena vacatura nobo cu excepcion di algun vacatura den Husticia y algun vacatura den departamento vital pa Pais Aruba.

- Advertisement -

DUNA COMENTARIO

Please enter your comment!
Please enter your name here