Bunita gesto di Premier Wever-Croes
ORANJESTAD (AAN): Un potret cu e fin di siman aki a haci bon propaganda pa Aruba, tanto local como internacional, ta e potret di Prome Minister Evelyn Wever-Croes sacando un potret di un pareha turista. No ta trata di e potret riba su mes, sino mas bien di e gesto.
Prome Minister a publica diabierna ultimo riba su pagina di facebook: “Despues di parada di Brandweer, m’a mira un pareha turista ta lucha pa saca un selfie. M’a ofrece nan pa saca e pic pa nan. Semper sea servicial cu nos turistanan”. Diabierna tabata tin e parada di Cuerpo di Bombero como clausura di e ‘Fire Prevention Week’ y e pareha turista tabata den cercania di e evento.
E pareha no tabata sa ken a acerca nan y ofrece pa saca nan potret. E pareha naturalmente a keda masha agradecido. Despues cu nan a haya sa cu ta Prome Minister di pais Aruba a ofrece pa saca nan potret, nan a keda masha impresiona y agradecido.
Prome Minister ta demostra cu accion loke nos cada un como Arubiano mester demostra. Cu nos ta stima nos pais y cu nos ta aprecia tur turista cu ta inverti den nos economia.
Locual mas ta resalta di e accion y e potret aki ta, cu nos Prome Minister ta un persona humilde, cordial y servicial.
E potret y e gesto di nos Prome Minister sigur lo ta un bon promocion pa Aruba.
