Como un ora despues situacion a normaliza:
ORANJESTAD (AAN) — E Relacionista Publico di Aeropuerto Reina Beatrix, Hendrik Croes, a duna prensa informacion Diaranzon mainta, tocante e motibo pa cual tabata tin evacuacion den e instalacionnan di Aeropuerto.
Hendrik Croes a splica cu for di mainta tempran nan a ripara cu tabata tin un problema den e sistema di ‘Charlie Charlie’, cu ta e departamento di comunicacion, unda tur e camaranan cu tin den aeropuerto ta wordo maneha.
Ora cu e profesionalnan concerni a bay investiga a bin constata un problema den e sistema UPS (Uninterruptible Power Supply) cu tin den e aeropuerto, cu a ocasiona un explosion y a cuminza gasnan, posiblemente toxico.
Como consecuencia di esaki AAA tuma contacto mesora cu Departamento di Bombero, a cera e area unda e oficina aki ta situa, pa e gasnan no por sali.
Croes a relata cu e aspecto fastioso ta cu e ora ey e gasnan ta bay na e sistema di cooling cu tin na aeropuerto, anto como medida di precaucion di brandweer, mester a evacua tur persona cu tabata na aeropuerto e momento ey, den e area di yegada.
“Esaki no a conta pa e pasaheronan cu tabata den e sala di espera. E situacion no tabata tin influencia riba nan”, sr. Croes a splica.
No obstante si a trece efecto den e area di salida di e parti bieu full ariba biniendo abao, e PR a menciona. E no a conta solamente pa e pasaheronan sino pa tur esnan cu ta traha den e area ey.
Na e momentonan ey tabata tin un vuelo (DIVI) cu lo a caba di yega pero e pasaheronan no por a baha for di e avion, te ora Brandweer lo a duna OK.
E siguiente avion cu mester a baha na Aruba tabata JetBlue pa 10.30 am, cu speranza cu e situacion lo por a wordo soluciona prome cu e avion baha. En todo caso, si no lo a logra e pasaheronan lo no por a baha for di avion.
Ambulance tabata tey pa duna e asistencia necesario y aeropuerto mes tin su mes ekipo pa por yuda esnan cu por a sinti efecto di e situacion.
Esaki ta prome biaha cu aeropuerto a experiencia e tipo di situacion aki, Hendrik Croes a bisa, contestando un pregunta di prensa.
Despues di un ora di e sucedido e situacion a normaliza na aeropuerto, tanto pa e trahadornan como pa e pasaheronan cu a yega Aruba. Informacion cu DIARIO a haya ta indica tambe cu ta e board di e computer a kima, pero afortunadamente no tabata e bateria, cu si lo por a causa un situacion mas serio y fastioso.
