Family First Aruba hunto cu Ministerio di Asunto Social y Labor
ORANJESTAD (AAN) – Den cuadro di aña di Famia Fundacion Family First Aruba den colaboracion cu Ministerio di Asunto Social y Labor ta organisa dia 9 di november benidero, un dia pa famia titula: “Family Fun Day.”
Gobierno di Aruba a declara aña 2019, “Aña di Famia,” y den cuadro di e Fundacion Family First su vision y trabaonan specifico cu a bin ta haci riba e tereno familiar pa e ultimo 6 añanan, Ministerio di Asunto Social y Labor a acerca Fundacion Family First pa sostene e fundacion su iniciativa pa cu e “Family Fun Day.”
“Nos a scoge pa duna famianan oportunidad pa pasa ful un dia hunto y recreativo, unda nan por pasa un dia ameno y gozoso cu otro, formando parti di diferente actividad y weganan cu nos tin riba programa y cu lo tuma luga na Parke Arawa,” Sra. Jennie Lion Sjin Tjoe, Directora di Fundacion Family First ta splica.
“Orario di e evento ta di 8am pa 8pm. E ta uno gratis y ta inclui desayuno, lunch, cena y premio pa Famia ganado. Ta rekeri pa cada famia y cada miembro di famia participa na actividad y weganan di e programa. Cantidad di Famia cu nos por tuma ta 10 y ta basa ariba ‘First come first serve.’ E edad di e yiunan cu nos ta tumando e biaha aki ta specifico di 10 pa 16 aña. Un Famia por existi entre un mama of un tata soltero cu nan yiu (nan) of un tata, mama y yiu (nan),” Sra. Lion Sjin Tjoe ta añadi.
Pa famianan interesa cu ta cumpli cu rekisitonan menciona por tuma contacto via email na info@familyfirstaruba.org.
