Home General Apertura di Bingo Hall na Joe Laveist Sport Park

Apertura di Bingo Hall na Joe Laveist Sport Park

169
0
SHARE
- Advertisement -

Diadomingo 17 di November

ORANJESTAD (AAN) – Na Joe Laveist Sport Park,  Diaranzon di e siman aki, tabata tin un conferencia di prensa, relaciona cu e reapertura di Bingo Hall, cu lo tuma lugar Diadomingo awo, dia 17 di November, den e mesun localidad aki, cuminzando pa 4 or di atardi.

Esaki ta un proyecto a bin dilanti durante e Summit cu recientemente San Nicolas Business Association a organiza. Tabata presente den e encuentro aki cu prensa, sr. Andres Hernandez, presidente di SNBA, y e gerentenan di Five Crown Gaming y Sunrise Bingo.

Solognier a hiba palabra y a splica cu e centro deportivo aki tabata tin hopi aña cera y despues di a rondea un lugar pa bin bek cu bingo y no a haya, a dicidi pa drecha Joe Laveist, loke a tuma nan casi dos aña, te cu por fin a logra renove por completo y converti’e de un lugar multifuncional, y e proyecto aki lo bira un realidad.

E no tabata facil pasobra tabata tin hopi trabao cu mester a wordo haci. Un localidad multifuncional, sr. Solognier a subraya, por huur e pa fiesta, pa organiza comemento, y tur otro actividad, pero deporte ta keda na prome lugar y cu mester wordo practica tur dia den e centro deportivo aki.

Ya caba scolnan ta usando e lugar pa haci deporte y e ta bayendo tremendamente bon, sr. Solognier a subraya. El a expresa cu e pueblo tambe tin cu haci uso di e lugar, y pesey a bin cu e proyecto di Hall Bingo.

Solognier a menciona cu na San Nicolas tin un grupo grandi di hende cu gusta bingo, pero mayoria ta den edad grandi caba, y no ta facil pa nan bin Oranjestad, ya cu hopi di nan tin cu uza bus.

Esaki ta un di e puntonan pa cual a bin cu e proyecto aki, pa nan por entretene na mes sin nodi bin te Playa, y hunga nan bingo.

El a relata cu un investigacion cu a tuma lugar na Groningen a demostra cu hopi hende di edad avanza cu a cuminza perde nan facultad di memoria, ora nan a cuminza hunga bingo, seis luna despues caba di ta bezig cune, nan a recupera nan memoria y a bolbe biba manera cu nan ya desea.

E Bingo Hall ta bay wordo teni cada dos siman pa wak con e ta resulta y despues, probablemente, ta bay tur siman.

Sr. Solognier a subraya cu San Nicolas ta e prome cu ta bay tin bingo digital, fuera di un casino. Asina aki lo tin hopi mas proyecto cu ta den planning.

- Advertisement -

DUNA COMENTARIO

Please enter your comment!
Please enter your name here