Kwartiermaker di Bureau Ombudsman Sahaira Kelly
ORANJESTAD (AAN): Kwartiermaker di Bureau Ombudsman Sahaira Kelly a indica cu Aruba tabata presente na e reunion riba nivel di Reino di Ombudsman, pero e ta lamenta cu e desaroyonan positivo no a wordo subraya tocante institucion di Ombudsnan na Aruba.
“Mi a tuma nota di e articulo publica pa Caribisch Netwerk titula: “Aruba vol schaamte naast Koning Willem-Alexander”. Como kwartiermaker di Bureau Ombudsman Aruba mi kier a enfatisa cu e reunion riba nivel di Reino di e Ombudsman, a bay den un esfera sumamente positivo y sigur tabata un honor di por a reuni cu su Mahestad Rey Willem-Alexander y combersa cu n’e riba diferente aspecto cu ta regarda e introduccion di un Ombudsman pa Aruba”, Kelly a duna di conoce.
El a indica cu na ningun momento Aruba a mustra berguensa, al contrario, Aruba ta hopi gradici cu anualmente ta ricibi invitacion pa participa na e reunionnan di e Ombudsmannan den Reino.
Cu Aruba no a institui un Ombudsman ainda lo pasa pronto pa pasado. Esaki sigur, si tene na cuenta e fase den cual e ley ta, cu den e programa di gobernacion e institucion di un Ombudsman ta wordo explicitamente menciona, cu tin presupuesto disponibel, cu e urgencia y diligencia di parti nos organo di mas halto, esta Parlamento, pa cu e introduccion di un Ombudsman pa Aruba.
