Home Editorial Cu bista riba futuro nos ta yama danki pa un aña mas 

Cu bista riba futuro nos ta yama danki pa un aña mas 

42
0
SHARE
- Advertisement -

Editorial

Diadomingo 3 november, DIARIO ta celebra su cumpleaños. Nos ta recorda con porfin Aruba por a conta cu un matutino, produci y imprimi na Aruba na idioma Papiamento segun ortografia Arubano.

DIARIO a nace cu bista riba futuro di Aruba. Na momento cu nos prome edicion a wordo entrega na Aruba, e futuro di Aruba tabata base di e matutino cu a bira herment pa lucha pa Aruba.

Awe nos por mira atras riba un historia directamente liga na e historia di Aruba como pais autonomo cu tabata e realisacion di e anhelo Arubano.

E vision di Jossy Mehson Mansur a bira realidad. Cu bista riba futuro el a transforma su sentimento patriotico den un motor pa lucha pa futuro di e pais.

DIARIO a keda semper e bista pa futuro di Aruba y awe ainda e lucha pa e futuro cu Aruba merece ta keda e centro di tur nos esfuersonan.

Manera e lucha pa Status Aparte a demostra, pa por a yega na e gran momento cu Reino Hulandes a bay di acuerdo cu e autonomia Arubano na 1983, mester a deshaci di pasado.

Aruba mester a crea un pais nobo. Un pais cu su propio Parlamento, Gobierno, Ministerio Publico, su propio Banco Central y moneda, un pais capaz pa sobrevivi e olanan di mas bruto cu futuro lo a entrega.

Bista riba futuro tabata un exigencia for di cuminsamento ora e prome departamentonan di Aruba pa carga gobernacion a bira realidad pero tambe economia, financia, asuntonan social entre otro, a bira tarea directo di Aruba autonomo cu mester tabata capaz pa dirigi su mes.

Bista riba futuro tabata importante mientras e comunidad a desaroya. Cada tempo ta treci su estilo nobo. Exigencianan a cambia rapidamente. No tabata un asunto solamente di contenido cu tabata skirbi historia di nos pais, pero tambe avance tecnologico cu rapidez increibel.

DIARIO a imprimi e prome corant na color na Antia Hulandes. Produccion di noticia a wordo computarisa. Awe e observador di costanan pa mira kico ta alcansa Aruba, a wordo reemplasa pa e pantaya di internet cu ta progresa.

Awe nos ta prepara pa recorda nos nacemento como e prome matutino di Aruba. Nos fundado Jossy Mehsen Mansur no ta cu nos mas. Pero e ta bibo den e trabou di su sucesornan, su yiunan Jossito, Luis Minguel, Eduardo y Damalice Mansur cu mescos cu Jossy por conta cu e respaldo dinamico di Sra. Nuhad Mansur.

E espirito di e prome momento di DIARIO ta bibo den e generacion nobo di trahadonan di DIARIO cu ta prepara pa un dia entrega timon na otro generacion nobo di Aruba.

Nos bista ta dirigi pa semper riba futuro den cual no solamente Aruba mester sobrevivi, pero den cual e pais mester sigui construi caminda nobo, cu sistemanan nobo, cu generacion nobo di Arubiano cu ta traha na interes di e generacion cu mester bini despues di nan.

Na e momentonan aki nos ta prepara pa sigui sirbi Aruba di acuerdo di e exigencianan mas moderno. Pero tin algo cu hamas lo cambia.

Aruba semper lo ta motibo di existencia di DIARIO, cu semper lo traha cu bista riba futuro di Aruba.

Danki pa bo sosten Aruba. Futuro ta warda!

- Advertisement -

DUNA COMENTARIO

Please enter your comment!
Please enter your name here