Mary de Cuba y Roland Jansen:
ORANJESTAD (AAN) – Den conferencia di prensa yama pa Aruba Lions Club, sra. Mary de Cuba a hiba palabra, ken ta maneha e grupo Originales desde 27 aña pasa, consecutivamente.
Sra. de Cuba a expresa cu pa Originales ta un honor y un placer regala e pueblo di Aruba, un anochi cu un presentacion pa e temporada mas dushi di aña cu ta Pasco, ora cu sr. Ponson y Lions a acerca nan.
Nan no a duda mes pa ta hunto cu Banda La Paranda pa recorda 25 aña pasa con nan tabata goza hunto y nan lo haci tur posible pa ta prepara pa dia 1 di December, specialmente pa Lions y pa brinda e pueblo di Aruba nan dushi musica di Fin di Aña.
Seguidamente Roland Jansen, cu ta maneha Banda La Paranda tambe pa 27 aña, tambe ta un placer participa den e evento di Lions, aunke e grupo no tey mas. No obstante, nan ta hacie cu hopi amor y placer pa e publico y el a gradici Lions pa e invitacion, cu ta algo hopi bunita. El a expresa cu e tempo cu nan tabata comparti cu Originales, nunca nan lo lubida. Pues, un invitacion pa henter pueblo na Aruba Lions Club.
Finalmente, e presidente di Lions Club sr. Ivan Croes, a expresa cu e ta tuma e oportunidad aki pa gradici e comerciantenan cu ta sponsor e actividad aki di dia 1 di December, hacie posible. El a extende un invitacion na henter e pueblo di Aruba, pa e actividad aki cu ta bay bira Feria, Bazaar y Musica. El a subraya cu tur e placa genera pa e evento aki sin duda algun ta bay bek den comunidad. Cu sosten di comunidad nan por sigui desaroya actividadnan y tambe yuda diferente club, fundacion y scolnan.
