ORANJESTAD (AAN): Ultimo tempo hopi chauffeur ta topa cu situacion sorpresivo riba caminda, mirando con otro chauffeurnan ta cuminza core mey-mey di caminda. Autonan cu ta bin di direccion contrario, ta haya nan obliga di baha di caminda.
Kico ta pasando? Esaki kizas ta e splicacion di con tabatin 2 accident pisa tanto Diabierna anochi y tambe Diasabra anochi riba e brug di Piedra Plat.
E caminda di “Brug di Piedra Plat” ta conoci como cu e caya un poco pariba di e cruzada pa bay Santa Rosa.
Diabierna alrededor di 7:30’or di anochi, tres auto a keda envolvi den desgracia riba e brug. Inmediatamente diferente unidad di Polis y Ambulans a acudi na e lugar, pa asina presta asistencia y atende e heridonan. Mesora Polis a cuminza cu e investigacion.
Diasabra alrededor di 7:30’or di anochi, otro accident ora cu un Toyota Yaris y un Honda sedan a dal frontal den otro. Testigonan a bisa Polis cu e Toyota Yaris y un Toyota Altezza tabata pustando bayendo pariba.
E Yaris a keda pues na su banda robez, y asina a bay dal den e Honda. E chauffeurnan a resulta herida, y Polis ta investigando pa check si berdad tabata pustando, of si acaso ta e Altezza a “cera” e otro chauffeur y no a lage pasa.
Un ciudadano a comenta na DIARIO, cu e ta spera cu DOW haci algo pa acelera e ponemento di linea blanco riba camindanan di Aruba. Hopi caminda principal NO tin e linea blanco mas. Aki mes por mira con e brug di Piedra Plat no tin linea mey-mey.
