Hubert Dirks di FTA
ORANJESTAD (AAN): Hubert Dirks, presidente di FTA a indica cu durante nan congreso di dos dia, nan a trata notulanan como tambe discusionnan riba relato financiero di 2017, caminda a bin hopi pregunta di parti di e delegadonan, algo cu nan ta aprecia pa motibo cu mas cla e informacion pasa ta mihor pa e organizacion y mas pregunta a wordo contesta, mas claridad nan haya ta yuda pa con mester trata na momento cu bo ta den un congreso, nan ta atende cu autoridad maximo cu ta tuma decision y cu mester ta transparente.
Segun Dirks, e tabata un congreso hopi interesante y riba di dos dia nan a sigui discuti riba presupuesto pa 2020 y den oranan di atardi nan a presenta tur actividad cu nan a realiza durante 2019 y asina e delegadonan por evalua y hasta coregi na unda nan ta kere cu nan a haci fout y asina bin cu proposicionnan pa nan pone den nan maneho pa dirigi e organizacion den 2020.
Apesar cu nan a trata varios punto interno, e puntonan di preocupacion entre miembronan tabata poder di compra, situacion social y impacto di e situacion financiero di pais Aruba. Esaki ta puntonan cu semper ta bin dilanti den tur reunion, riba tur nivel, den cada compania y den cada sector.
Dirks a indica cu tin sector cu ta wak un mehoracion den desaroyo, pero pa otronan esaki ta mas dificil y semper esaki ta dificil riba mesa di negociacionnan.
Apesar cu den sector hotelero e ta den bon caminda, nan ta firmando bon CAO, pero e ‘cost of doing business’ ta keda un problema pa e comerciantenan, economia no ta mustra cu e ta bay asina suave, y nan ta mira esaki den diferente caminda.
Sector comercio ta sinti’e mas dificil y sector casino tin problemanan cu pa hopi tempo tin situacionnan cu mester wordo drecha, sector di refineria tambe ta pendiente pa wak kico ta bay para cu e trahadornan di refineria den momento cu un ‘suspension agreement’ ta wordo firma pa haya sa kico ta para cu e trahadornan y ken ta bira responsable pa entrada di salario di e trahadornan aki.
Sector bancario tin su retonan y sector di construccion, na unda WAP a presenta un proposicion y FTA ta atende cu esaki cu WAP y Gobierno, y nan ta spera cu ilegalidad por wordo mihor controla of preveni na Aruba.
Falta di control ta problema cu a causa manera un expansion di ilegalidad na Aruba.
E ta mustra cu ta algo ‘normal’ pa biba y traha ilegalmente na Aruba. A bira tempo pa hala un linea, specialmente si ta papia di integridad, pa coregi tur caminda.
Cuerpo di Ambtenaar mester cumpli cu nan debernan, coregi erornan cu ta wordo cometi specialmente pa dunadornan di trabao.
