Home Editorial E responsabilidad pa Aruba den e panorama mundial alarmante

E responsabilidad pa Aruba den e panorama mundial alarmante

157
0
SHARE
- Advertisement -

Editorial 

Luna di November a habri cu informacionnan sumamente preocupante pa nos mundo y region, cu lo tin impacto riba Aruba.

Na cantidad di paisnan den nos vecindario, problemanan serio ta wordo raporta. Na e pais mas importante pa nos turismo cu ta Merca, instabilidad y incertidumbre ta crece mientras e pais falta un aña prome cu e eligi un presidente nobo dia 3 di November 2020.

Olanan internacional ta alcansa e costa di Aruba hunto cu problemanan cu ta afecta nos siguridad nacional. E grupo di migrantenan cu ta huy situacionnan politico den nos region, ta aumenta cu mas refugiado, Aruba mester prepara pa evita resultadonan negativo cu esaki por tin pa nos pais.

Cifranan mundial ta indica cu por spera un crecemento di refugiadonan economico indocumenta, den e situacion cu sigur e continente Latino Americano y Caribe conoce.

E caida di turismo for di Venezuela; e aumento di prijsnan di cuminda debi na cambio di paisnan productor for di cual nos ta importa alimento; e problemanan comercial grandi cu Aruba ta enfrenta, ta duna un bista cla di e impacto regional riba desaroyonan na nos pais.

Na momento cu Aruba mester atende un situacion mundial sumamente peligroso pa nos economia, e mester atende tambe cu e crisis financiero.

For di 2014 expertonan a adverti cu nos mester cambia nos rumbo si na 2018 nos kier a sobrevivi retonan importante. Na luga di reservanan di placa cu expertonan a exigi pa Aruba por a yega 2018 trankil, a crea e debe nacional cu awe nos mester paga y lo afecta nos tur.

Reino a cuminsa duna guia directo na e ruta cu Aruba mester sigui si e kier sali for di su problemanan actual. E Comision di Supervision di Reino a duna ehempel clave di gastonan di personal di Gobierno, cu mester baha.

Gastonan di overtime a causa sorpresa grandi pa e pais. Sector priva, cu ta hiba un lucha grandi pa sobrevivi, mester carga un responsabilidad mas grandi ora gobierno di Aruba baha su cantidad di personal.

Aruba ta drenta un siman crucial pero tambe di preocupacion grandi. E temporada di turismo ta habri den un situacion mundial cu ta exigi trankilidad y pas pa sano huicio por prevalece na Aruba.

Gobierno mester tuma decisionnan cu bienestar nacional y no resultado politico na bista. Sindicatonan di gobierno mester comprende cu nan tambe mester mira bienestar nacional, cu no ta permiti mas gasto di gobierno.

Politiconan den oposicion mester demostra nan madurez y pone Aruba dilanti. Nan no por tene bista fiha riba conteo di nan voto y nan bienestar politico.

Temporada di turismo ta bay cuminsa. Kico e futuro di nos pilar economico lo ta, ta depende di e grado di responsabilidad cu cada ciudadano ta demostra.

DIARIO ta informa Aruba debidamente pa asina nos hunto por confronta un temporada sumamente dificil cu Aruba mester enfrenta.

 

 

- Advertisement -

DUNA COMENTARIO

Please enter your comment!
Please enter your name here