Home Gobierno Gobierno a logra un presupuesto balansa y e surplus manera a acorda

Gobierno a logra un presupuesto balansa y e surplus manera a acorda

115
0
SHARE
- Advertisement -

Prome Minister Evelyn Wever-Croes:

ORANJESTAD (AAN) – Gobierno di Aruba a tene su conferencia di prensa semanal, Dialuna 11 di November, cu participacion di Minister Presidente mr. Evelyn Wever-Croes, Minister di Economia y Finanzas mr. Xiomara Ruiz-Maduro y Minister Otmar Oduber, titular di Infrastructura, Maneho di Medio Ambiente y Desaroyo Teritorial.

E conferencia di prensa a tuma lugar den e sala di prensa renova cu, por cierto, ta mas accesible pa e miembronan di prensa.

Minister Presidente a cuminza expresando cu,  gobierno tin bon noticia pa comunidad, riba e tereno financiero “por fin!”.

E dignatario a subraya cu gobierno a logra un presupuesto balansa pa 2020 mas e surplus manera a acorda, den e maneho financiero economico di gobierno y, cu Hulanda.

“Naturalmente, esaki no a bay sin su sacrificio; pero e ta un bunita resultado di dedicacion, vision y sacrificio conhunto” Prome Minister a expresa.

Minister Presidente a bolbe bisa cu ora nan a drenta den gobierno casi dos aña pasa, casi nan no por a kere kico nan a haya. Esta, un situacion financiero hopi penoso cu un deficit riba papel cerca di 300 miyon florin cu a logra baha, pa 2018 ainda, pa 155 miyon.

“Despues a bin e pasonan duro cu nos tur mester a tuma hunto pa asina nos pone e pais bek riba e rumbo financiero cu nos a compromete pa pon’e” Prome Minister a indica.

Minister Presidente a menciona kico e deficit financiero aki a causa manera inflacion, stagnacion economico y cu nos pais tabata den un rumbo totalmente ekivoca. Tambe cu gobierno no por a inverti den enseñanza manera e tabata kier. No por a inverti den cuido di salud, den cuido di nos grandinan, den casnan pa ancianonan, den vivienda social, segun Prome Minister Evelyn Wever-Croes.

El a sigui bisa cu awo, den menos di dos aña di tempo, gobierno a logra di trece su presupuesto den balansa y hasta e por marca e prome surplus den e presupuesto, despues di 12 aña.

El a reitera cu tabata decisionnan dificil, pero nan tabata basa riba un vision. E vision y e compromiso pa saca Aruba for di e problemanan financiero y e sacrificio conhunto cu awor gobierno ta asina leu.

“ Esaki ta e prome biaha desde 2008 cu gobierno ta mira un presupuesto balansa cu surplus. Prome cu esey tabata tin un surplus na 2003 y prome cu esey na 1993. Kiermen, esaki ta e di cuater surplus cu Aruba a conoce desde cu el a bira un pais. Pero e prome den e tempo moderno aki, y basa riba maneho structural y estrategia y ta suppose di keda asina tambe, pasobra nos a tuma e decisionnan, pone e pais den e rumbo pa e solucionnan structural, pa e por keda asina pa e futuro generacionnan, Naturalmente e ta depende di gobiernonan responsable den futuro”, Prome Minister a señala.

E mandatario a sigui bisa cu e sacrificio cu gobierno y henter comunidad a haci ta pone cu awor gobierno por cuminza paga su debe bek, y baha su debe mas ainda. Esaki ta pa 2020 y pa 2021 por cuminza sinti un poco mas alivio y mira inversionnan, cu pa hopi aña no a wordo haci, den nos comunidad. “Pa aña 2919 nos ta cerando cu cifranan hopi positivo”, Prome Minister a subraya.

 

- Advertisement -

DUNA COMENTARIO

Please enter your comment!
Please enter your name here